ഓൺലൈൻ ഉപയോക്താക്കൾക്കൊരു സന്തോഷ വാർത്തയുമായി ഫ്ലിപ്കാർട്ട്. പ്രമുഖ ഒടിടി പ്ലാറ്റ്ഫോമായ നെറ്റ്ഫ്ലിക്സുമായി സഹകരിക്കുകയാണ് ഫ്ലിപ്കാർട്ട്. ഫ്ലിപ്കാർട്ട് പ്ലസ് ലോയല്റ്റി അംഗങ്ങൾക്ക് തങ്ങളുടെ പതിവ് ഷോപ്പിംഗിലൂടെ എല്ലാ മാസവും സൗജന്യമായി നെറ്റ്ഫ്ലിക്സ് മൊബൈൽ പ്ലാൻ സ്വന്തമാക്കാൻ അവസരം. ഓഗസ്റ്റ് 1 മുതല് ഈ ആനുകൂല്യം പ്രാബല്യത്തില് വരും.
ഇതിനായി പ്രത്യേകം സബ്സ്ക്രിപ്ഷനോ റീച്ചാർജോ ചെയ്യേണ്ടതില്ല. ഫ്ലിപ്കാർട്ട് പ്ലസ് അംഗങ്ങൾ ഒരു മാസത്തിനുള്ളിൽ കുറഞ്ഞത് 299 രൂപ വീതമുള്ള 4 ഓർഡറുകൾ പൂർത്തിയാക്കണം. ഫ്ലിപ്കാർട്ട്, ഫ്ലിപ്കാർട്ട് ഗ്രോസറി, ഫ്ലിപ്കാർട്ട് മിനിറ്റ്സ് എന്നിവയിലൂടെ നടത്തുന്ന വാങ്ങലുകൾ ഇതിനായി പരിഗണിക്കും. ഉപഭോക്താവ് നാലാമത്തെ ഓര്ഡര് പൂര്ത്തിയാക്കിയാല്, അധിക പണമടയ്ക്കാതെ ഫ്ളിപ്കാര്ട്ട് ആപ്പിലൂടെ 30 ദിവസത്തേക്ക് നെറ്റ്ഫ്ളിക്സ് മൊബൈല് പ്ലാന് ലഭിക്കും. ഈ ആനുകൂല്യം ഓരോ മാസവും വീണ്ടും നേടുന്നതിനായി അതേ രീതിയിലുള്ള ഷോപ്പിങ് പൂര്ത്തിയാക്കണം.
നിലവില് ഫ്ളിപ്കാര്ട്ട് പ്ലസ് അംഗമല്ലാത്ത ഉപഭോക്താക്കള്ക്ക്, 12 മാസത്തിനുള്ളില് അധിക ചെലവില്ലാതെ 15 ഓര്ഡറുകള് പൂര്ത്തിയാക്കിയാല് ലോയല്റ്റി പ്രോഗ്രാമില് അംഗമാകാന് അര്ഹത ലഭിക്കും. ഇന്ത്യയിലെ നെറ്റ്ഫ്ളിക്സിന്റെ ആദ്യ ഇ-കൊമേഴ്സ് പങ്കാളിത്തമാണിതെന്ന് കമ്പനികള് അറിയിച്ചു. ഒരു സാധാരണ ഷോപ്പിങിലൂടെ നെറ്റ്ഫ്ളിക്സ് ഡിസ്ക്കൗണ്ട് നേടാന് കഴിയുന്നത് ഇതാദ്യമായാണ്.
SUMMARY: Netflix is free for Flipkart customers; will be available from August 1
