ബെംഗളൂരു: ബെംഗളൂരുവിന് സമീപം നെലമംഗല താലൂക്കിലെ കമ്പാലു ഗ്രാമത്തിന് സമീപം ചൊവ്വാഴ്ച രാത്രി മഹീന്ദ്ര താർ എസ്‌.യു.വി മറിഞ്ഞുണ്ടായ അപകടത്തിൽ രണ്ട് യുവാക്കൾ മരിച്ചു. മൂന്ന് പേർക്ക് ഗുരുതര പരുക്കേറ്റു. ദിലീപ്, നിതേഷ് എന്നിവരാണ് മരിച്ചത്.
അഞ്ച് പേരടങ്ങുന്ന സംഘം സുഹൃത്തിന്റെ ജന്മദിനാഘോഷത്തിൽ പങ്കെടുത്ത ശേഷം മഹീന്ദ്ര താർ എസ്‌.യു.വിയിൽ മടങ്ങുന്നതിനിടെയാണ് അപകടമുണ്ടായത്. കമ്പാലു ഗ്രാമത്തിന് സമീപം എത്തിയപ്പോൾ വാഹനം നിയന്ത്രണം വിട്ട് റോഡരികിലേക്ക് മറിഞ്ഞ് മറിയുകയായിരുന്നു. അപകടത്തിന്റെ ആഘാതത്തിൽ ദിലീപും നിതേഷും സംഭവസ്ഥലത്തുവെച്ചുതന്നെ മരിച്ചു.
വാഹനത്തിലുണ്ടായിരുന്ന മറ്റ് മൂന്ന് പേർക്ക് ഗുരുതര പരുക്കേറ്റു. നാട്ടുകാരും പോലീസും ചേർന്ന് ഇവരെ ഉടൻ സമീപത്തെ ആശുപത്രിയിലെത്തിച്ചു. ഇവരിൽ ചിലരുടെ നില ഗുരുതരമാണെന്നാണ് വിവരം. അപകടവിവരം ലഭിച്ചതിനെ തുടർന്ന് നെലമംഗല പോലീസ് സ്ഥലത്തെത്തി രക്ഷാപ്രവർത്തനം നടത്തി. തകർന്ന വാഹനം ക്രെയിൻ ഉപയോഗിച്ച് മാറ്റിയ ശേഷമാണ് ഗതാഗതം സാധാരണ നിലയിലാക്കിയത്.
അമിതവേഗമാണോ, ഡ്രൈവറുടെ അശ്രദ്ധയാണോ അപകടത്തിന് കാരണമെന്ന് കണ്ടെത്താൻ അന്വേഷണം ആരംഭിച്ചതായി പോലീസ് അറിയിച്ചു. സമീപത്തെ സിസിടിവി. ദൃശ്യങ്ങളും മറ്റ് തെളിവുകളും പരിശോധിച്ചുവരികയാണ്. കേസെടുത്ത് അന്വേഷണം പുരോഗമിക്കുകയാണ്.
SUMMARY: Two youths die, three injured after Thar SUV overturns near Nelamangala
