ന്യൂഡൽഹി: രാജ്യത്തെ പ്രീപെയ്ഡ് മൊബൈൽ ഉപഭോക്താക്കൾക്ക് ആശ്വാസമേകി ടെലികോം നിർദേശങ്ങളിൽ നിർണായക ഭേദഗതിയുമായി ടെലികോം റെഗുലേറ്ററി അതോറിറ്റി ഓഫ് ഇന്ത്യ(ട്രായ്). 28 ദിവസത്തെ റീച്ചാർജ് കാലാവധിക്ക് പകരം ഇനി മുതൽ കൃത്യം 30 ദിവസത്തെ വാലിഡിറ്റിയുള്ള പ്ലാനുകൾ കമ്പനികൾ നൽകണം. ഇതോടെ ഉപഭോക്താക്കൾ പ്രതിവർഷം ചെയ്യേണ്ട റീച്ചാർജുകളുടെ എണ്ണം 13-ൽ നിന്ന് 12 ആയി കുറയും.
ഇതുമായി ബന്ധപ്പെട്ട ട്രായുടെ പുതിയ ഉപഭോക്തൃ സംരക്ഷണ ചട്ടങ്ങൾ നിലവിൽ വന്നു. പ്ലാനുകളുടെ കാലാവധി, വോയ്സ്, എസ്.എം.എസ് സേവനങ്ങൾ എന്നിവയുമായി ബന്ധപ്പെട്ട പുതിയ ഭേദഗതിയിലൂടെ മുപ്പത് ദിവസത്തിലോ അതിൽ കുറവിലോ കാലാവധിയുള്ള പ്രത്യേക ടാരിഫ് വൗച്ചറുകൾ കൂടുതൽ ലഭ്യമാക്കാൻ ടെലികോം കമ്പനികൾക്ക് നിർദ്ദേശം നൽകിയിട്ടുണ്ട്.
28 ദിവസത്തെ പ്ലാനുകളെ “പ്രതിമാസ പ്ലാൻ” എന്ന് വിളിച്ച് ഉപഭോക്താക്കളെ വഞ്ചിക്കുന്നതിനെതിരെ രാജ്യസഭാ എംപി രാഘവ് ഛദ്ദ പാർലമെന്റിൽ നടത്തിയ ശക്തമായ ഇടപെടലാണ് ഈ തീരുമാനത്തിലേക്ക് വഴിതെളിച്ചത്. കഴിഞ്ഞ മാർച്ച് 11-ന് പാർലമെന്റിൽ വിഷയം ഉന്നയിച്ച അദ്ദേഹം, ഇന്റർനെറ്റ് ഡാറ്റ ആവശ്യമില്ലാത്ത സാധാരണക്കാർക്കായി വോയ്സ്, എസ്എംഎസ് മാത്രമുള്ള കുറഞ്ഞ നിരക്കിലുള്ള പ്ലാനുകൾ വേണമെന്നും ആവശ്യപ്പെട്ടിരുന്നു.
കഴിഞ്ഞ സെപ്റ്റംബർ ഇരുപത്തിരണ്ടിനാണ് ‘ടെലികോം കൺസ്യൂമേഴ്സ് പ്രൊട്ടക്ഷൻ (പതിമൂന്നാം ഭേദഗതി) റെഗുലേഷൻസ്, 2026’ ട്രായ് ഔദ്യോഗികമായി വിജ്ഞാപനം ചെയ്തത്. വിവിധ കോണുകളിൽ നിന്ന് ലഭിച്ച ആയിരത്തിലധികം പ്രതികരണങ്ങൾ വിശദമായി പരിശോധിച്ച ശേഷമാണ് പുതിയ ചട്ടങ്ങൾക്ക് രൂപം നൽകിയിട്ടുള്ളത്. മൊബൈൽ ഡാറ്റ ആവശ്യമില്ലാത്ത മുതിർന്ന പൗരന്മാർക്കും കുറഞ്ഞ ബജറ്റിൽ പ്രധാനമായും കോളുകൾക്കായി മാത്രം ഫോൺ ഉപയോഗിക്കുന്ന സാധാരണക്കാർക്കും ഇൻകമിംഗ്, ഔട്ട്ഗോയിംഗ് കോളുകൾ മാത്രം ലഭിക്കുന്ന വോയ്സ്-എസ്എംഎസ് വൗച്ചറുകൾ ലഭ്യമാക്കണമെന്നും ഇത്തരം പാക്കുകളുടെ നിരക്കുകൾ ഉചിതമായ രീതിയിൽ കുറയ്ക്കണമെന്നും ചട്ടങ്ങൾ കർശനമായി വ്യവസ്ഥ ചെയ്യുന്നുണ്ട്.
SUMMARY: Good news for mobile users; Monthly recharge plan now has 30 days validity
