ഡൽഹി: ഡല്‍ഹിയില്‍ മുൻ പശ്ചിമ ബംഗാള്‍ മുഖ്യമന്ത്രി മമത ബാനർജിയെയും അരവിന്ദ് കെജ്‌രിവാളിനെയും കസ്റ്റഡിയിലെടുത്ത് ഡല്‍ഹി പോലീസ്. ലോധി എസ്റ്റേറ്റിന് സമീപത്ത് വെച്ചാണ് കേജ്‌രിവാളിനെ പോലീസ് തടഞ്ഞുനിർത്തി കസ്റ്റഡിയിലെടുത്തത്. പ്രതിപക്ഷ നേതാക്കളെ കൂട്ടത്തോടെ കരുതല്‍ തടങ്കലിലാക്കുന്ന പോലീസ് നടപടിക്കെതിരെ രാജ്യവ്യാപകമായി വൻ പ്രതിഷേധം ഇരമ്പുകയാണ്.
കൂടാതെ തൃണമൂല്‍ കോണ്‍ഗ്രസ് എംപിമാരായ ഡെറക് ഒബ്രിയൻ, പ്രതിമ മണ്ഡല്‍, ദോല സെൻ എന്നിവരെയും പോലീസ് കസ്റ്റഡിയിലെടുത്തു. ഡല്‍ഹിയിലെ സൗത്ത് അവന്യൂവിലുള്ള ബസ് സ്റ്റാൻഡില്‍ തൃണമൂല്‍ നേതാക്കള്‍ ധർണ നടത്തിയതിന് പിന്നാലെയാണ് നടപടി. തിരഞ്ഞെടുപ്പ് കമ്മീഷനെതിരായ പ്രതിഷേധങ്ങള്‍ക്കിടെയാണ് നേതാക്കള്‍ കസ്റ്റഡിയിലായത്.
വോട്ടർപട്ടികയുടെ പ്രത്യേക തീവ്ര പരിഷ്‌കരണമായ (SIR) നടപടിക്കെതിരെ പ്രതിപക്ഷ പാർട്ടികള്‍ രാജ്യവ്യാപകമായി ഉന്നയിക്കുന്ന വിമർശനങ്ങളുടെ പശ്ചാത്തലത്തിലാണ് തൃണമൂല്‍ കോണ്‍ഗ്രസിന്റെ പ്രതിഷേധം. വോട്ടർപട്ടിക പരിഷ്‌കരണം തിരഞ്ഞെടുപ്പിന്റെ നീതിപൂർവമായ നടത്തിപ്പിനെ ബാധിക്കുമെന്നാണ് പ്രതിപക്ഷത്തിന്റെ ആശങ്ക. എന്നാല്‍ ക്രമക്കേടുകള്‍ നടന്നെന്ന ആരോപണങ്ങള്‍ തിരഞ്ഞെടുപ്പ് കമ്മീഷനും ബിജെപിയും നിഷേധിച്ചിട്ടുണ്ട്. മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് പ്രതിപക്ഷ നേതാക്കള്‍ കഴിഞ്ഞ ദിവസങ്ങളിലും ഡല്‍ഹിയില്‍ പ്രതിഷേധം നടത്തിയിരുന്നു.
തിരഞ്ഞെടുപ്പ് കമ്മീഷൻ ഓഫീസിലേക്ക് നടത്തിയ മാർച്ച്‌ പോലീസ് തടഞ്ഞതിനെത്തുടർന്ന് നിരവധി പ്രതിപക്ഷ നേതാക്കളെ കസ്റ്റഡിയിലെടുത്തതായും റിപ്പോർട്ടുകളുണ്ട്. ഗ്യാനേഷ് കുമാറിനെതിരെ മമത ബാനർജിയും പരസ്യമായി വിമർശനം ഉന്നയിച്ചിരുന്നു.
SUMMARY: Intense protests in Delhi: Delhi Police detain Mamata Banerjee and Arvind Kejriwal
