ഡൽഹി: രാജ്യത്ത് വാണിജ്യ ആവശ്യങ്ങള്‍ക്കുള്ള പാചകവാതക സിലിണ്ടറിന്റെ വില വീണ്ടും വർധിപ്പിച്ചു. 19 കിലോഗ്രാം സിലിണ്ടറിന് കൊച്ചിയില്‍ 12.50 രൂപയാണ് കൂട്ടിയത്. ഇതോടെ പുതിയ വില 2,840 രൂപയായി. അതേസമയം, ഗാർഹിക ആവശ്യങ്ങള്‍ക്കുള്ള എല്‍.പി.ജി സിലിണ്ടറുകളുടെ വിലയില്‍ മാറ്റമില്ല. പുതുക്കിയ നിരക്കുകള്‍ നിലവില്‍ വന്നു. തുടർച്ചയായ മൂന്നാം മാസമാണ് വാണിജ്യ സിലിണ്ടറുകളുടെ വില ഉയർത്തുന്നത്.
സെപ്റ്റംബറില്‍ 9.50 രൂപയും ഒക്ടോബറില്‍ 62.50 രൂപയും വർധിപ്പിച്ചിരുന്നു. ദീപാവലിയോട് അനുബന്ധിച്ചുള്ള ഉത്സവകാലത്ത് എല്‍.പി.ജി വില കൂട്ടിയത് ഹോട്ടല്‍-റെസ്റ്റോറന്റ് ഉടമകള്‍ക്കും മറ്റ് ചെറുകിട വ്യാപാരികള്‍ക്കും തിരിച്ചടിയാകും. ഭക്ഷണ സാധനങ്ങളുടെ വില വർധിക്കാൻ ഇത് ഇടയാക്കുമെന്നതിനാല്‍ സാധാരണക്കാരെയും വിലക്കയറ്റം പരോക്ഷമായി ബാധിക്കും.
ഡല്‍ഹി ഉള്‍പ്പെടെയുള്ള രാജ്യത്തെ പ്രധാന നഗരങ്ങളില്‍ 10 രൂപ മുതല്‍ 17 രൂപ വരെയാണ് വാണിജ്യ എല്‍.പി.ജി സിലിണ്ടറുകള്‍ക്ക് വർധിച്ചത്. ഡല്‍ഹിയില്‍ 19 കിലോഗ്രാം സിലിണ്ടറിന്റെ പുതിയ നിരക്ക് 2,820 രൂപയാണ്.
SUMMARY: The price of a commercial LPG cylinder has been increased again
