കൊച്ചി: യുവ ഡോക്ടറെ ക്രൂരമായി മര്‍ദ്ദിച്ചെന്ന കേസില്‍ യുവനടി ഉള്‍പ്പെടെ മൂന്നുപേര്‍ അറസ്റ്റില്‍. അഭിഭാഷകയും യുവനടിയുമായ അതുല്യ ചന്ദ്രന്‍ ഉള്‍പ്പെടെയാണ് അറസ്റ്റിലായത്. ചികിത്സക്കെന്ന വ്യാജേന വിളിച്ചുവരുത്തി ആക്രമിക്കുകയായിരുന്നു. കേസില്‍ അതുല്യ ഉള്‍പ്പെടെ പന്ത്രണ്ട് പ്രതികളാണുള്ളത്. ഈ മാസം രണ്ടിനായിരുന്നു ഡോക്ടറെ ആക്രമിച്ചത്. മൂന്ന് ലക്ഷം രൂപയുടെ മൊബൈല്‍ ഫോണുകള്‍ കവര്‍ന്നുവെന്നും പരാതിയുണ്ട്. കടവന്ത്ര പോലീസാണ് കേസെടുത്തിരിക്കുന്നത്.
മര്‍ദനമേറ്റ ഡോക്ടറും നടി അതുല്യയും നേരത്തെ തന്നെ പരസ്പരം പരിചയമുള്ള സുഹൃത്തുക്കളാണ്. തന്റെ അമ്മയുടെ അനിയത്തിക്ക് ചില ഗുരുതര ആരോഗ്യപ്രശ്നങ്ങളുണ്ടെന്നും എത്രയും വേഗം ഫ്ലാറ്റില്‍ എത്തി ചികിത്സിക്കണമെന്നും അതുല്യ ഡോക്ടറോട് ആവശ്യപ്പെടുകയായിരുന്നു. സുഹൃത്തിന്റെ അഭ്യര്‍ത്ഥന മാനിച്ചാണ് ഡോക്ടര്‍ ചികിത്സക്കായി ഫ്‌ലാറ്റിലേക്ക് പോകാന്‍ തയ്യാറായത്.
എന്നാല്‍ ഫ്ലാറ്റില്‍ എത്തിയ ഡോക്ടറെ കാത്ത് നടിയടക്കം വന്‍ സംഘം തന്നെ അവിടെ ഉണ്ടായിരുന്നു. അതുല്യ ഉള്‍പ്പെടെ 12 പേരാണ് സംഭവ സമയത്ത് ഫ്‌ലാറ്റിനുള്ളില്‍ ഉണ്ടായിരുന്നതെന്ന് പരാതിയില്‍ പറയുന്നു. ഡോക്ടര്‍ അകത്തുകയറിയ ഉടന്‍ തന്നെ ഇവര്‍ ഡോക്ടറെ തടഞ്ഞുവെക്കുകയും ഭീഷണിപ്പെടുത്താന്‍ തുടങ്ങുകയും ചെയ്തു. തുടര്‍ന്ന് യാതൊരു പ്രകോപനവുമില്ലാതെ സംഘം ഡോക്ടര്‍ക്ക് നേരെ അക്രമം അഴിച്ചുവിടുകയായിരുന്നു എന്നുമാണ് പരാതി.
SUMMARY: Young doctor brutally assaulted in Kochi; three people, including actress Athulya Chandra, arrested
