കളമശ്ശേരി: പെരുമ്പാവൂരില്‍ ഇതര സംസ്ഥാനക്കാരായ ദമ്പതികളുടെ മൂന്ന് വയസുള്ള ആണ്‍കുട്ടിയുടെ മരണം കൊലപാതകമെന്ന് വ്യക്തമാക്കുന്ന പോസ്റ്റുമോർട്ടം റിപ്പോർട്ട്. കുട്ടിയുടെ തലയ്ക്ക് ശക്തമായി ഇടിച്ചതാകാം മരണകാരണമെന്നാണ് സൂചന. ശരീരത്തില്‍ നിരവധി പരിക്കുകള്‍ കണ്ടെത്തിയിട്ടുണ്ട്. കുട്ടി അതിക്രൂരമായ മർദനത്തിന് ഇരയായതായും പോസ്റ്റുമോർട്ടത്തില്‍ വ്യക്തമായി.
സംഭവവുമായി ബന്ധപ്പെട്ട് കുഞ്ഞിന്റെ രണ്ടാനച്ഛൻ അസം സ്വദേശി മഹേശ്വറിനെ പോലീസ് കസ്റ്റഡിയിലെടുത്തിട്ടുണ്ട്. എന്നാല്‍ ഇയാള്‍ കുറ്റം സമ്മതിച്ചിട്ടില്ല. മഹേശ്വർ കുട്ടിയെ നിരന്തരം മർദിക്കാറുണ്ടായിരുന്നുവെന്ന് കുട്ടിയുടെ അമ്മയും നാട്ടുകാരും പോലീസിന് മൊഴി നല്‍കിയിട്ടുണ്ട്. വീടിന്റെ മുകളില്‍നിന്ന് വീണ് പരുക്കേറ്റതാണെന്ന് പറഞ്ഞാണ് വ്യാഴാഴ്ച രാവിലെ ഇയാളുടെ ഭാര്യയുടെ ആദ്യവിവാഹത്തിലെ മകൻ ബിറ്റുപാൻ എന്ന മൂന്നുവയസുകാരനെ പെരുമ്പാവൂർ താലൂക്ക് ആശുപത്രിയിലെത്തിച്ചത്. എന്നാല്‍ ചികിത്സയ്ക്കിടെ ഉച്ചയോടെ കുട്ടി മരിച്ചു.
തുടർന്ന് ഇൻക്വസ്റ്റ് നടപടികള്‍ക്കായി പെരുമ്പാവൂർ പോലീസ് കളമശ്ശേരി മെഡിക്കല്‍ കോളേജിലെത്തിയപ്പോഴാണ് കുട്ടിയുടെ മുഖത്ത് രക്തം കല്ലിച്ച പാടുകള്‍ കണ്ടെത്തിയത്. വീടിന്റെ മുകളില്‍നിന്ന് വീണാണ് കുട്ടിക്ക് പരുക്കേറ്റതെന്ന് രണ്ടാനച്ഛൻ പൊലീസിനോടും ആവർത്തിച്ചു. എന്നാല്‍ സംശയം തോന്നിയ പോലീസ് സമീപവാസികളില്‍നിന്ന് വിവരങ്ങള്‍ ശേഖരിച്ചു. രണ്ടാനച്ഛൻ കുട്ടിയെ നിരന്തരം മർദിക്കാറുണ്ടായിരുന്നുവെന്ന അയല്‍വാസികളുടെ മൊഴിയുടെ അടിസ്ഥാനത്തിലാണ് മഹേശ്വറിനെ കസ്റ്റഡിയിലെടുത്തത്.
വല്ലത്തെ കെ.കെ. പ്ലൈവുഡ് കമ്പനിയിലെ തൊഴിലാളിയാണ് മഹേശ്വർ. ഭാര്യയുടെ ആദ്യവിവാഹത്തിലെ രണ്ട് കുട്ടികള്‍ക്കൊപ്പമാണ് ഇയാള്‍ വല്ലത്തെ വാടകമുറിയില്‍ താമസിച്ചിരുന്നത്. ആറ് വയസുള്ള പെണ്‍കുട്ടിയാണ് മൂത്ത കുട്ടി.
SUMMARY: Death of three-year-old in Perumbavoor is a murder; stepfather in custody
