മുംബ : അന്ധേരി വെസ്റ്റിലെ ഫ്ലാറ്റിലുണ്ടായ വൻ തീപിടിത്തത്തിൽ ഒരാൾക്ക് ദാരുണാന്ത്യം. തീപിടിത്തത്തെ തുടർന്ന് ലിഫ്റ്റിൽ കുടുങ്ങിയ 57കാരനായ സുരക്ഷാ ജീവനക്കാരനാണ് മരിച്ചത്. പുക ശ്വസിച്ച് ശ്വാസംമുട്ടിയാണ് മരണമെന്ന് അധികൃതർ അറിയിച്ചു. ദീപാവലിക്ക് അപാർട്ട്മെന്റിൽ തെളിയിച്ച ദീപത്തിൽ നിന്നാണ് തീപടർന്നതെന്നാണ് പ്രാഥമിക നിഗമനം. ലിഫ്റ്റിനുള്ളിൽ ബോധരഹിതനായ നിലയിൽ കണ്ടെത്തിയ അദ്ദേഹത്തെ ഉടൻ കൂപ്പർ ആശുപത്രിയിൽ എത്തിച്ചെങ്കിലും മരണം സ്ഥിരീകരിക്കുകയായിരുന്നു.
അന്ധേരി ലോഖണ്ഡ്‌വാലയിലെ റൺവാൾ ടവറിൽ ശനിയാഴ്ച രാത്രി 9.50ഓടെയാണ് തീപിടിത്തമുണ്ടായത്. കെട്ടിടത്തിന്റെ 17ാം നിലയിലെ ഫ്ലാറ്റ് നമ്പർ 1701ൽ നിന്നാണ് തീപടർന്നത്. ഉടൻ തന്നെ സ്ഥലത്തെത്തിയ അഗ്നിശമനസേന രക്ഷാപ്രവർത്തനം ആരംഭിച്ചു. രാത്രി 10.30ഓടെയാണ് തീ പൂർണമായും നിയന്ത്രണവിധേയമായത്. അപാർട്ട്മെന്റിലെ വീട്ടുപകരണങ്ങളെല്ലാം പൂർണമായും കത്തിനശിച്ചു.
അതേസമയം അന്ധേരിയിലെ സംഭവത്തിന് ശേഷം, 30 മിനിറ്റിനിടെ മുംബൈയിലെ രണ്ടിടങ്ങളിൽ കൂടി സമാനമായ തീപിടിത്തങ്ങൾ റിപ്പോർട്ട് ചെയ്യപ്പെട്ടിട്ടുണ്ട്. കാന്തിവിലി വെസ്റ്റിലെ 22 നില കെട്ടിടത്തിന്റെ താഴത്തെ നിലയിലും ഗോരെഗാവ് ഈസ്റ്റിലെ 19-ാം നിലയിലുള്ള ഫ്ലാറ്റിന്റെ ഗാലറിയിലുമാണ് തീപിടിത്തമുണ്ടായത്. ഇവിടെയൊന്നും ആളപായം റിപ്പോർട്ട് ചെയ്തിട്ടില്ല. ദീപാവലി ആഘോഷങ്ങളുടെ ഭാഗമായി പൊട്ടിച്ച പടക്കങ്ങളിൽ നിന്നാകാം ഈ തീപിടിത്തങ്ങളെല്ലാം ഉണ്ടായതെന്നാണ് സംശയിക്കുന്നത്. തീപിടത്തങ്ങൾ സംബന്ധിച്ച് വിശദമായ അന്വേഷണം നടക്കുകയാണ്.
SUMMARY: A fire in a high-rise building in Mumbai: A security guard trapped in the lift died
