ബെംഗളൂരു: ബെംഗളൂരുവിലെ വൈറ്റ്ഫീൽഡിൽ അഭിഭാഷകൻ ബി. മഞ്ജുനാഥിനെ (43) വെടിവെച്ചുകൊലപ്പെടുത്തിയ കേസിൽ ഒരാളെ ബിഹാറിൽനിന്ന് പോലീസ് അറസ്റ്റ് ചെയ്തു. കേസിലെ പ്രധാന പ്രതിയായ പവൻ കുമാർ ദുബെയുടെ കൂട്ടാളി അമിത് കുമാർ ദുബെയെയാണ് അന്വേഷണസംഘം പിടികൂടിയത്. കൊലപാതകത്തിന് ശേഷം ഒളിവിൽ കഴിയുകയായിരുന്ന ഇയാളെ പ്രത്യേക അന്വേഷണത്തിനൊടുവിലാണ് വൈറ്റ്ഫീൽഡ് പോലീസ് പിടികൂടിയത്
വൈറ്റ്ഫീൽഡ് മേഖലയിൽ അഭിഭാഷകനായ മഞ്ജുനാഥിന് നേരെ നടന്ന ആക്രമണം നഗരത്തിൽ വലിയ ചർച്ചയായിരുന്നു. 2026 ഒക്ടോബർ 18-ന് രാത്രി 11.30-ഓടെ വൈറ്റ്ഫീൽഡിലെ പട്ടന്തൂർ അഗ്രഹാരയിലുള്ള മഞ്ജുനാഥിന്റെ വീടിന് മുന്നിലാണ് സംഭവം നടന്നത്.
മഞ്ജുനാഥിന്റെ ഉടമസ്ഥതയിലുള്ള കെട്ടിടത്തിലെ വാടകക്കാരായിരുന്ന രണ്ട് ബീഹാർ സ്വദേശികളുമായി വാടക കുടിശ്ശികയെച്ചൊല്ലി സംഭവത്തിന് ഒരു മണിക്കൂർ മുൻപ് തർക്കമുണ്ടായിരുന്നു. പിന്നീട് ബൈക്കിൽ തിരിച്ചെത്തിയ പ്രതികൾ വാടക നൽകാനാണെന്ന് പറഞ്ഞ് മഞ്ജുനാഥിനെ പുറത്തേക്ക് വിളിക്കുകയായിരുന്നു. ഒരാൾ പണം എണ്ണാനായി നൽകിയ തക്കത്തിന് മറ്റേയാൾ നാടൻ തോക്ക് ഉപയോഗിച്ച് മഞ്ജുനാഥിന്റെ നെറ്റിയിലും നെഞ്ചിലും വെടിയുതിർക്കുകയായിരുന്നു. ബീഹാർ സ്വദേശികളും ബെംഗളൂരുവിൽ ഡെലിവറി ബോയ്‌സ് ആയി ജോലി ചെയ്തിരുന്നവരുമായ പവൻ കുമാർ ദുബെ,അമിത് കുമാർ ദുബെ എന്നിവരാണ് കേസിലെ പ്രതികൾ.
തമിഴ്‌നാട്, തെലങ്കാന, ഡൽഹി, പശ്ചിമ ബംഗാൾ, ബീഹാർ എന്നിവിടങ്ങളിൽ എട്ട് പ്രത്യേക പോലീസ് സംഘങ്ങൾ നടത്തിയ അന്വേഷണത്തിനൊടുവിലാണ് കഴിഞ്ഞ ദിവസം അമിത് കുമാർ ദുബെയെ ബീഹാറിലെ ബക്‌സ ഗ്രാമത്തിൽ നിന്ന് പിടികൂടിയത്. ട്രാൻസിറ്റ് വാറന്റ് നേടിയ പോലീസ് ഇയാളെ ബെംഗളൂരുവിലേക്ക് കൊണ്ടുവരികയാണ്
കേസിലെ മുഖ്യപ്രതി പവൻ കുമാർ ദുബെ ഇപ്പോഴും ഒളിവിലാണ്. ഇയാളെ കണ്ടെത്തുന്നതിനായി പോലീസ് വിവിധ സംസ്ഥാനങ്ങളിൽ അന്വേഷണം വ്യാപിപ്പിച്ചിട്ടുണ്ട്. അറസ്റ്റിലായ അമിത് കുമാർ ദുബെയെ ചോദ്യം ചെയ്യുന്നതിലൂടെ കൊലപാതകത്തിന്റെ ആസൂത്രണം, പ്രതികൾ തമ്മിലുള്ള ബന്ധം, രക്ഷപ്പെടാൻ സഹായിച്ചവരുടെ പങ്ക് എന്നിവയെക്കുറിച്ച് കൂടുതൽ വിവരങ്ങൾ ലഭിക്കുമെന്നാണ് അന്വേഷണസംഘത്തിന്റെ പ്രതീക്ഷ. കൊലപാതകത്തിന് ഉപയോഗിച്ച ആയുധം, പ്രതികൾക്ക് ലഭിച്ച സഹായം, ഇത് കേവലം വാടക തർക്കമാണോ അതോ ക്വട്ടേഷൻ കൊലപാതകമാണോ തുടങ്ങിയ കാര്യങ്ങളിലും അന്വേഷണം തുടരുകയാണ്.
SUMMARY: Lawyer murdered in Bengaluru; one of the accused arrested in Bihar
