തിരുവനന്തപുരം: രാഹുല് മാങ്കൂട്ടത്തിലിനെതിരായ രണ്ട് ബലാത്സംഗ കേസുകളില് പ്രത്യേക അന്വേഷണ സംഘം കരട് കുറ്റപത്രം തയ്യാറാക്കി. ബലാത്സംഗം, ഭ്രൂണഹത്യയ്ക്ക് പ്രേരിപ്പിക്കല്, ശാരീരിക ഉപദ്രവം, ഭീഷണിപ്പെടുത്തല് തുടങ്ങിയ ഗുരുതര വകുപ്പുകള് ചുമത്തിയാണ് രണ്ട് കേസുകളിലും കുറ്റപത്രം തയ്യാറാക്കിയിരിക്കുന്നത്. നിയമോപദേശത്തിനായി കൈമാറിയ കരട് കുറ്റപത്രത്തില് പരിശോധന പൂർത്തിയായ ശേഷമായിരിക്കും അന്തിമ കുറ്റപത്രം കോടതിയില് സമർപ്പിക്കുക.
കേസുകളിലെ അന്വേഷണം പൂർത്തിയായതായി എസ്.ഐ.ടി വ്യക്തമാക്കി. അന്വേഷണ സംഘത്തിന് നേതൃത്വം നല്കിയിരുന്ന എസ്.പി ജി. പൂങ്കുഴലി കേന്ദ്ര ഡെപ്യൂട്ടേഷനില് പോയതിനെത്തുടർന്ന് ചുമതല ഒഴിഞ്ഞിരുന്നു. എന്നാല് കുറ്റപത്രം തയ്യാറായ സാഹചര്യത്തില് പകരം മറ്റൊരാള്ക്ക് അന്വേഷണച്ചുമതല നല്കേണ്ടതില്ലെന്നാണ് പോലീസിന്റെ തീരുമാനം.
തിരുവനന്തപുരം സ്വദേശിനിയായ യുവതിയെ വിവാഹവാഗ്ദാനം നല്കി ഫ്ലാറ്റുകളിലും പാലക്കാട്ടും എത്തിച്ച് പീഡിപ്പിച്ചെന്നതാണ് ഇതിലൊരു കേസ്. ഈ കേസില് രാഹുല് മാങ്കൂട്ടത്തിലിന് ഹൈക്കോടതി നേരത്തെ മുൻകൂർ ജാമ്യം അനുവദിച്ചിരുന്നു. ബെംഗളൂരുവില് പഠിക്കുന്ന യുവതിയെ നാട്ടിലേക്ക് വരുന്ന വഴി ഹോട്ടലിലെത്തിച്ച് പീഡിപ്പിച്ചെന്നതാണ് കുറ്റപത്രം തയ്യാറാക്കിയ രണ്ടാമത്തെ കേസ്.
SUMMARY: Rape case against Rahul Mamkootathil; draft charge sheet prepared















