അനന്ത്നാ​ഗ്-രജൗരി സീറ്റിലെ തിരഞ്ഞെടുപ്പ് നീട്ടിവച്ചു

കശ്മീരിലെ ലോക്സഭാ തിരഞ്ഞെടുപ്പ് തീയതിയിൽ മാറ്റം. അനന്ത്നാ​ഗ്-രജൗരി ലോക്സഭാ സീറ്റിലെ വോട്ടെടുപ്പ് മെയ് ഏഴിൽ നിന്ന് 25-ലേക്ക് മാറ്റിവച്ചതായി തിരഞ്ഞെടുപ്പ് കമ്മീഷൻ അറിയിച്ചു. ജമ്മുകശ്മീരിലെ സ്ഥിതി​ഗതികൾ വിലയിരുത്തിയതിന് പിന്നാലെയാണ് കമ്മീഷന്റെ നീക്കം.

വിവിധ രാഷ്‌ട്രീയ പാർട്ടികളിൽ നിന്നും ഇത്തരമൊരും ആവശ്യം ഉയർന്നതായും കമ്മീഷൻ ചൂണ്ടിക്കാട്ടി. പ്രതികൂല കാലാവസ്ഥ അടക്കം പലവിധ കാരണങ്ങളാൽ മേഖലയിൽ തിരഞ്ഞെടുപ്പ് പ്രചാരണത്തിന് തടസം നേരിട്ടിരുന്നു.

ഇത് വോട്ടെടുപ്പിനെ ബാധിക്കുമെന്നതിനാൽ ജമ്മുകശ്മീരിലെ നിലവിലെ സാഹചര്യത്തിൽ തിരഞ്ഞെടുപ്പ് തീയതി നീട്ടിവയ്‌ക്കുകയാണെന്ന് കമ്മീഷൻ വ്യക്തമാക്കി. നേരത്തെ പുറത്തിറക്കിയ നിർദേശപ്രകാരം മൂന്നാം ഘട്ട വോട്ടെടുപ്പിലാണ് കശ്മീർ ഉൾപ്പെട്ടിരുന്നത്.

എന്നാൽ പുതിയ നിർദേശമനുസരിച്ച് ആറാം ഘട്ടത്തിലാണ് കശ്മീരിൽ തിരഞ്ഞെടുപ്പ് നടക്കുക. ഇതിനോടകം വോട്ടെടുപ്പിന്റെ ആദ്യ രണ്ട് ഘട്ടങ്ങൾ പൂർത്തിയായി. കേരളത്തിലെയും കർണാടകയിലെയും ലോക്സഭാ തിരഞ്ഞെടുപ്പ് കഴിഞ്ഞ 26-നായിരുന്നു നടന്നത്.