ബെംഗളൂരു: റമ്മികൾച്ചർ ആപ്പുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ 442.35 കോടി മൂല്യമുള്ള സ്വത്തുക്കള് എൻഫോഴ്സ്മെന്റ് ഡയറക്ടറേറ്റ് കണ്ടുകെട്ടി.
സ്ഥിരനിക്ഷേപങ്ങൾ, വാണിജ്യ കെട്ടിടങ്ങൾ, ആഡംബര വില്ല, വിവിധ താമസ വസ്തുക്കൾ എന്നിവയാണ് കണ്ടുകെട്ടിയ ആസ്തികളിൽ ഉൾപ്പെടുന്നത്. ഇവയിൽ ചിലത് കമ്പനിയുടെ ഓഹരിയുടമകളുടെ കുടുംബാംഗങ്ങളുടെയും സ്വകാര്യ കുടുംബ ട്രസ്റ്റുകളുടെയും അനുബന്ധ സ്ഥാപനങ്ങളുടെയും പേരിലാണെന്ന് ഇ.ഡി. അറിയിച്ചു.
ഗെയിംസ്ക്രാഫ്റ്റ് ടെക്നോളജീസും അനുബന്ധ സ്ഥാപനങ്ങളും റമ്മികൾച്ചർ, റമ്മിപ്രൈം, പ്ലേഷിപ്പ്, റമ്മിടൈം തുടങ്ങിയ ആപ്പുകളിലൂടെ ഓൺലൈൻ റിയൽ മണി ഗെയിമുകൾ നടത്തിയിരുന്നുവെന്നാണ് ഇ.ഡി.യുടെ കണ്ടെത്തൽ. ഉപയോക്താക്കളെ അറിയിക്കാതെ ബോട്ടുകൾ ഉപയോഗിച്ചെന്നും പണം പിൻവലിക്കുന്നതിന് നിയന്ത്രണങ്ങൾ ഏർപ്പെടുത്തിയെന്നും അന്വേഷണ ഏജൻസി ആരോപിച്ചു.
നേരത്തെ നടത്തിയ പരിശോധനകളിൽ ബാങ്ക് ബാലൻസുകൾ ഉൾപ്പെടെ ഏകദേശം 495 കോടിയുടെ ജംഗമ ആസ്തികൾ മരവിപ്പിക്കുകയും, 11 ലക്ഷം പണവും 2.30 കിലോഗ്രാം സ്വർണം, വജ്രാഭരണങ്ങൾ എന്നിവ പിടിച്ചെടുക്കുകയും ചെയ്തിരുന്നു.
ജൂലൈയിൽ ഏകദേശം 1,906 കോടി മൂല്യമുള്ള ആസ്തികളും ഇ.ഡി. താൽക്കാലികമായി അറ്റാച്ച് ചെയ്തിരുന്നു. പുതിയ നടപടിയോടെ കേസിൽ അറ്റാച്ച്, മരവിപ്പിക്കൽ, പിടിച്ചെടുക്കൽ എന്നിവ ഉൾപ്പെടെയുള്ള ആസ്തികളുടെ ആകെ മൂല്യം ഏകദേശം 2,843 കോടിയായി.
SUMMARY: Money laundering case linked to RummyCulture app; ED attaches assets worth ₹442 crore.
