ബെംഗളൂരു: ഹെബ്ബാളിനും സിൽക്ക് ബോർഡ് ജംഗ്ഷനും ഇടയിലുള്ള ടണൽ റോഡ് പദ്ധതി മൂന്ന് വർഷത്തിനുള്ളിൽ പൂർത്തിയാക്കുമെന്ന് ഉപമുഖ്യമന്ത്രി ഡി.കെ. ശിവകുമാർ. റോഡിനുള്ള ടെൻഡർ നടപടികൾ ഫെബ്രുവരിയോടെ ആരംഭിക്കും. രണ്ട് ഘട്ടങ്ങളായി ടണൽ റോഡ് പദ്ധതി (തുരങ്കപാത) പൂർത്തിയാക്കും. സർക്കാരും ബിബിഎംപിയും സംയുക്തമായി പദ്ധതിക്ക് ഫണ്ട് അനുവദിക്കും.
നിരവധി ധനകാര്യ സ്ഥാപനങ്ങൾ പദ്ധതിക്ക് ധനസഹായം നൽകാൻ മുന്നോട്ട് വന്നിട്ടുണ്ട്. എച്ച്ഡിഎഫ്സി ബാങ്ക്, ഹൗസിങ് ആൻഡ് അർബൻ ഡെവലപ്‌മെന്റ് കോർപറേഷൻ, പവർ ഫിനാൻസ് കോർപറേഷൻ എന്നിവ ടണൽ റോഡ് പദ്ധതിക്ക് ധനസഹായം നൽകാൻ തയാറാണ്. മൂന്ന് ധനകാര്യസ്ഥാപനങ്ങളും 8,000 കോടി രൂപ വായ്പ നൽകാമെന്നാണ് സർക്കാരിന് ഉറപ്പ് നൽകിയിരിക്കുന്നത്.
ഏകദേശം 17,780 കോടി രൂപയാണ് പദ്ധതിച്ചെലവായി പ്രതീക്ഷിക്കുന്നത്. തുരങ്കപാത ഭൂമിക്കടിയിലൂടെ കടന്നുപോകുന്നതിനാൽ അധിക ഭൂമി ആവശ്യമില്ല. ആരുടെയും ഭൂമി നഷ്ടമാകുന്ന സാഹചര്യം ഉണ്ടാകില്ലെന്ന് ബെംഗളൂരു വികസന മന്ത്രി കൂടിയായ ഡികെ ശിവകുമാർ കൂട്ടിച്ചേർത്തു.
TAGS: BENGALURU | TUNNEL ROAD PROJECT
SUMMARY: Bengaluru tunnel road project to be completed within three years
