മാലിന്യം റോഡിൽ എറിയുന്നത് തടഞ്ഞ പ്രൊഫസർക്ക് മർദനം; മൂന്ന് പേർ പിടിയിൽ

ബെംഗളൂരു: മാലിന്യം റോഡിൽ വലിച്ചെറിയുന്നത് ചോദ്യം ചെയ്ത കോളേജ് പ്രൊഫസറെ മർദിച്ച മൂന്ന് പേർ പിടിയിൽ. കുമാരസ്വാമി ലേഔട്ടിലാണ് സംഭവം. നഗരത്തിലെ സ്വകാര്യ സ്ഥാപനത്തിൽ ജോലി ചെയ്യുന്ന ഭാനുപ്രസാദ് (26), ശരത് (23), അമൃത് കുമാർ (24) എന്നിവരാണ് പിടിയിലായത്. അരവിന്ദ് ഗുപ്തയെന്ന പ്രൊഫസറെയാണ് ഇവർ ആക്രമിച്ചത്. അരവിന്ദ് കഴിഞ്ഞ ദിവസം തന്റെ സ്കൂട്ടറിൽ ജോലിക്ക് പോകുമ്പോൾ പ്രതികൾ റോഡരികിൽ മാലിന്യം വലിച്ചെറിയുന്നത് ശ്രദ്ധയിൽപ്പെട്ടു.

ഇതോടെ അരവിന്ദ് സ്കൂട്ടർ നിർത്തി മാലിന്യം തള്ളുന്നതിനെ എതിർത്തു. ഇത് മൂവരെയും പ്രകോപിപ്പിച്ചു. തുടർന്നുണ്ടായ വാക്കേറ്റത്തിൽ ഇവർ അരവിന്ദിനെ ആക്രമിക്കുകയായിരുന്നു. തുടർന്ന് അരവിന്ദ് പോലീസിന്റെ സമീപിച്ചു. സിസിടിവി ദൃശ്യങ്ങൾ കേന്ദ്രീകരിച്ചു നടന്ന പരിശോധനയിലാണ് പ്രതികൾ പിടിയിലാകുന്നത്. റോഡിൽ മാലിന്യം വലിച്ചെറിഞ്ഞതിനു പ്രതികൾക്ക് ബിബിഎംപി പിഴ ചുമത്തി.

TAGS: BENGALURU | ARREST
SUMMARY: Three arrested for assaulting professor over garbage row in Bengaluru