കോഴിക്കോട്: മെഡിക്കൽ കോളജ് അത്യാഹിത വിഭാഗത്തിലെ യു.പി.എസ് റൂമിൽ നിന്നുണ്ടായ തീപിടിത്തത്തിന് പിന്നാലെ മരിച്ച അഞ്ച് പേരുടെ മരണകാരണം സംബന്ധിച്ച് അവ്യക്തത തുടരുന്നു. കോഴിക്കോട് വെസ്റ്റ്ഹില് സ്വദേശി ഗോപാലന്, വടകര സ്വദേശി സുരേന്ദ്രന്, കൊയിലാണ്ടി സ്വദേശി ഗംഗാധരന്, പശ്ചിമബംഗാളില് നിന്നും ഗംഗ, വയനാട് സ്വദേശി നസീറ എന്നിവരുടെ മരണത്തിലാണ് ബന്ധുക്കള് സംശയം ഉന്നയിച്ചത്. പുക ശ്വസിച്ചാണ് ഇവരുടെ മരണമെന്നാണ് ബന്ധുക്കളും എം.എല്.എ ടി സിദ്ദിഖും ആരോപിക്കുന്നത്. ഈ വാദം മെഡിക്കൽ കോളജ് പ്രിൻസിപ്പൽ ഇന്നലെ തള്ളിയിരുന്നു. സംഭവവുമായി ബന്ധപ്പെട്ട് ഇന്ന് രാവിലെ 10.30 ന് മെഡിക്കല് ബോര്ഡ് യോഗം ചേരും. നസീറയുടെയടക്കം രണ്ട് പേരുടെ പോസ്റ്റ്മോർട്ടം ഇന്ന് നടക്കും.
വെള്ളിയാഴ്ച രാത്രി ഏഴരയോടെയാണ് മെഡിക്കല് കോളേജ് അത്യാഹിത വിഭാഗത്തില് നിന്ന് പുക ഉയര്ന്നത്. ഉടന് തന്നെ ഫയര്ഫോഴ്സ് സ്ഥലത്തെത്തി രോഗികളെ ഒഴിപ്പിച്ചു. സംഭവത്തില് ആരോഗ്യ വകുപ്പ് മന്ത്രി വീണാ ജോര്ജ് മെഡിക്കല് വിദ്യാഭ്യാസ വകുപ്പ് ഡയറക്ടര്ക്ക് അന്വേഷണത്തിന് നിര്ദേശം നല്കി. പുക ഉയർന്നതോടെ രോഗികളെ മുഴുവൻ മാറ്റിയെന്നും മറ്റു അത്യാഹിതങ്ങളൊന്നും ഉണ്ടായിട്ടില്ലെന്നും എല്ലാ നിയന്ത്രണ വിധേയമാക്കിയെന്നും ആശുപത്രി സൂപ്രണ്ട് ഡോ. ശ്രീജയൻ പറഞ്ഞു.
അതേസമയം അത്യാഹിത വിഭാഗം മുഴുവനും പോലീസ് സീൽ ചെയ്തു. കോഴിക്കോട് ബീച്ച് ഹോസ്പിറ്റലില് അത്യാഹിത സേവനം ലഭ്യമാക്കുമെന്ന് ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. മെഡിക്കല് കോളേജിലെ ഡോക്ടര്മാരുടെ സേവനം കൂടി ഇവിടെ ലഭ്യമാക്കും.
<BR>
TAGS : FIRE BREAKOUT | KOZHIKODE MEDICAL COLLEGE
SUMMARY :Deaths following fire at medical college alleged to be due to smoke inhalation; Medical Board meeting today
