ബെംഗളൂരു: നമ്മ മെട്രോ യാത്രക്കാർക്കു കൂടുതൽ ആപ്പുകൾ ഉപയോഗിച്ച് ടിക്കറ്റെടുക്കാനാകുള്ള സൗകര്യം ഉടൻ ഒരുക്കുമെന്ന് ബിഎംആർസി. വെബ് ടാക്സി ആപ്പുകൾ ഉൾപ്പെടെ യാത്രാ സംബന്ധമായ ആപ്പുകളിലാണ് മെട്രോ ടിക്കറ്റുകൾ ലഭ്യമാകുക. കേന്ദ്ര സർക്കാരിന്റെ ഇകൊമേഴ്സ് ശൃംഖലയായ ഒഎൻഡിസിയുമായി ബിഎംആർസി കൈകോർക്കുന്നതോടെയാണിത്.
ഇതോടെ ടുമോക്, റാപ്പിഡോ ഉൾപ്പെടെ ആപ്പുകളിൽ മെട്രോ ടിക്കറ്റുകൾ ലഭ്യമാകും. ഒറ്റ ആപ്പ് ഉപയോഗിച്ച് യാത്ര നടത്താൻ ഇതു സഹായിക്കും. നിലവിൽ നമ്മ മെട്രോ, വാട്സാപ് ഉൾപ്പെടെയുള്ള ആപ്പുകൾ മുഖേനയാണ് മെട്രോ ടിക്കറ്റ് എടുക്കാനാകുക.
ഇലക്ട്രോണിക് സിറ്റിയിലേക്കുള്ള ആർവി റോഡ്-ബൊമ്മസന്ദ്ര പാതയിൽ സർവീസ് ആരംഭിക്കുന്നതോടെ യാത്രക്കാരുടെ എണ്ണം വർധിക്കുമെന്നത് ഉൾപ്പെടെ കണക്കിലെടുത്താണ് നടപടി.
SUMMARY: Bengaluru Namma Metro commuters can buy tickets on multiple mobility apps.
