തിരുവനന്തപുരം: ആഗോള അയ്യപ്പസംഗമം സെപ്റ്റംബര് 20ന് പമ്പ തീരത്ത് സംഘടിപ്പിക്കുമെന്ന് ദേവസ്വം മന്ത്രി വി.എന്. വാസവന്. വിവിധ രാജ്യങ്ങളില് നിന്നായി 3000 പ്രതിനിധികള് അണിചേരും. കേന്ദ്ര മന്ത്രിമാര്, മറ്റ് സംസ്ഥാന മുഖ്യമന്ത്രിമാരടക്കം പങ്കെടുക്കും. ചരിത്രത്തില് ആദ്യമായാണ് ഇത്രയും പ്രതിനിധികളെ പങ്കെടുപ്പിച്ച് അയ്യപ്പ സംഗമം സംഘടിപ്പിക്കുന്നത്. ശബരിമലയുടെ പ്രശസ്തി വ്യാപിപ്പിക്കുകയാണ് ലക്ഷ്യം. സര്ക്കാരും ദേവസ്വം ബോര്ഡും സംയുക്തമായാണ് സംഗമം ഒരുക്കുന്നത്. ലോകമെങ്ങുമുള്ള അയ്യപ്പന്മാരെ കേള്ക്കാനുള്ള അവസരമാണിതെന്ന് മന്ത്രി പറഞ്ഞു. പമ്പ ശ്രീരാമസാകേതം ഹാളില് ചേര്ന്ന സംഘാടകസമിതി രൂപീകരണ യോഗം ഉദ്ഘാടനം ചെയ്യുകയായിരുന്നു അദ്ദേഹം.
ശബരിമലയടക്കം വികസന പാതയിലാണ്. 1300 കോടിയുടെ ശബരിമല മാസ്റ്റര് പ്ലാന് തയ്യാറാക്കി. ശബരിമല വിമാനത്താവളം, റെയില്പാതയടക്കമുള്ള പ്രവര്ത്തനം പുരോഗമിക്കുന്നു. 2028ല് വിമാനത്താവളം കമ്മിഷന് ചെയ്യാനാണ് ഉദ്ദേശ്യം. ലോകമെങ്ങുമുള്ള അയ്യപ്പ ഭക്തരുടെ ക്രിയാത്മക നിര്ദേശം ശേഖരിക്കും. എല്ലാവരെയും പങ്കെടുപ്പിച്ച് സുതാര്യമായാണ് സംഗമം സംഘടിപ്പിക്കുന്നത്. ഭക്തരുടെ താല്പര്യം സംരക്ഷിച്ച് ആചാരാനുഷ്ഠാനം പാലിക്കും. തന്ത്രിയുടേതടക്കം അഭിപ്രായം സ്വീകരിക്കും. വിവിധ സംസ്ഥാനങ്ങളുമായി ആശയവിനിമയം നടത്തുന്നതായും മന്ത്രി അറിയിച്ചു.
പത്തനംതിട്ട നഗരത്തിൽ ജില്ലാ അധികൃതരുടെ കീഴിലാകും പ്രധാന സ്വാഗതസംഘം ഓഫീസ് തുറക്കുക. പമ്പ, പെരുനാട്, സീതത്തോട് എന്നിവിടങ്ങളിലും ഓഫീസുണ്ടാകും. മന്ത്രി പറഞ്ഞു.
അഡ്വ. കെ യു ജനീഷ്കുമാര് എംഎല്എ, തിരുവിതാംകൂര് ദേവസ്വം ബോര്ഡ് പ്രസിഡന്റ് പി എസ് പ്രശാന്ത്, ദേവസ്വം ബോര്ഡ് പ്രതിനിധികളായ എ അജികുമാര്, പി ഡി സന്തോഷ് കുമാര്, ദേവസ്വം കമീഷണര് ബി സുനില്കുമാര്, എന്എസ്എസ്, എസ്എന്ഡിപി, ഐക്യമലയരയ മഹാസഭ പ്രതിനിധികളായ എം സംഗീത് കുമാര്, സുരേഷ് പരമേശ്വരന്, കെ കെ സനല്കുമാര് എന്നിവർ പങ്കെടുത്തു.
SUMMARY: Global Ayyappa Sangam on September 20; 3000 delegates from different countries will participate
