കോഴിക്കോട്: ഇരിങ്ങണ്ണൂരില് ഒരു വിവാഹ വീട്ടില് കവർച്ച. ഞായറാഴ്ച നടന്ന ഒരു കല്യാണ ചടങ്ങിനിടെയാണ് വീട്ടില് സൂക്ഷിച്ചിരുന്ന സ്വർണവും പണവും നഷ്ടമായത്. ഇരിങ്ങണ്ണൂർ മുടവന്തേരിയിലെ ടി.പി. അബൂബക്കറിന്റെ വീട്ടിലാണ് മോഷണം നടന്നത്. 10 പവൻ സ്വർണവും 6,000 രൂപയുമാണ് നഷ്ടമായതെന്ന് വീട്ടുടമ പോലീസിന് നല്കിയ പരാതിയില് പറയുന്നു.
അബൂബക്കറിന്റെ മകൻ അബ്ദുല് സഹലിന്റെ വിവാഹ ചടങ്ങുകള് നടക്കുന്നതിനിടെയാണ് മോഷണം നടന്നത്. ഞായറാഴ്ച വൈകുന്നേരം 5:30-നും പുലർച്ചെ 1:30-നും ഇടയിലുള്ള സമയത്താണ് സംഭവം. വീടിന്റെ മുകളിലത്തെ നിലയിലുള്ള അലമാരയില് സൂക്ഷിച്ചിരുന്ന സ്വർണവും പണവുമാണ് മോഷണം പോയത്. ഏഴ് ലക്ഷത്തിലധികം രൂപ വിലവരുന്ന സ്വർണമാണ് നഷ്ടപ്പെട്ടതെന്നാണ് കണക്കാക്കുന്നത്.
അലമാരയുടെ താക്കോല് സമീപത്തുതന്നെ വെച്ചിരുന്നതിനാല് മോഷ്ടാവിന് ഇത് എളുപ്പത്തില് തുറക്കാൻ സാധിച്ചു. 50,000 രൂപയുടെ കെട്ടില് നിന്ന് 6,000 രൂപ മാത്രം എടുത്ത ശേഷം ബാക്കി പണം മോഷ്ടാവ് അലമാരയില്ത്തന്നെ വെച്ചതായും പരാതിയില് പറയുന്നു. നാദാപുരം പോലീസ് സംഭവത്തില് കേസെടുത്ത് അന്വേഷണം ആരംഭിച്ചു.
SUMMARY: Gold and cash stolen from wedding house
