കണ്ണൂർ: നടൻ മമ്മൂട്ടിയെയും അദ്ദേഹത്തെ സന്ദർശിച്ച ഡിവൈഎഫ്‌ഐ, എസ്‌എഫ്‌ഐ നേതാക്കളെയും ലക്ഷ്യമിട്ട് സമൂഹമാധ്യമങ്ങളില്‍ നടക്കുന്ന അധിക്ഷേപങ്ങള്‍ക്കെതിരെ സിപിഎം സംസ്ഥാന സമിതി അംഗം പി. ജയരാജൻ രംഗത്തെത്തി. മമ്മൂട്ടിയെ ഒരു രാഷ്ട്രീയ പാർട്ടിയുടെ പരിധിക്കുള്ളില്‍ ഒതുക്കാനാകില്ലെന്നും അദ്ദേഹം കേരളത്തിന്റെ പൊതുസ്വത്താണെന്നും ജയരാജൻ ഫേസ്ബുക്കിലൂടെ പ്രതികരിച്ചു.
കലാകാരന്മാരെ ആദരിക്കുകയും അവരുടെ സർഗാത്മകതയെ ചേർത്തുപിടിക്കുകയും ചെയ്യുന്നതാണ് കമ്യൂണിസ്റ്റ് സംസ്കാരത്തിന്റെ സവിശേഷതയെന്നും മമ്മൂട്ടിക്കെതിരായ അനാവശ്യമായ ഓണ്‍ലൈൻ ആക്രമണങ്ങള്‍ അവസാനിപ്പിക്കണമെന്നും അദ്ദേഹം ആവശ്യപ്പെട്ടു. വയനാട് ദുരന്തവുമായി ബന്ധപ്പെട്ട് മുൻപ് ഉയർന്നുവന്ന അഭിപ്രായവ്യത്യാസങ്ങള്‍ അന്നുതന്നെ നേരിട്ടുള്ള ചർച്ചകളിലൂടെ പരിഹരിച്ചതാണെന്ന് ജയരാജൻ വ്യക്തമാക്കി.
സിപിഎം വയനാട് ജില്ലാ സെക്രട്ടറിയും മമ്മൂട്ടിയും തമ്മിലുള്ള സൗഹൃദം പരസ്യമായ കാര്യമാണെന്നും അദ്ദേഹം ചൂണ്ടിക്കാട്ടി. പഴയ തർക്കങ്ങള്‍ അവസാനിച്ചിട്ടും അവ വീണ്ടും ചർച്ചയാക്കി മമ്മൂട്ടിയെ അധിക്ഷേപിക്കാൻ ചില കേന്ദ്രങ്ങള്‍ ശ്രമിക്കുന്നത് പ്രത്യേക താല്‍പര്യങ്ങള്‍ മുൻനിർത്തിയാണെന്നും ജയരാജൻ വിമർശിച്ചു. കഴിഞ്ഞുപോയ വിഷയങ്ങള്‍ വീണ്ടും ഉയർത്തിക്കൊണ്ടുവന്ന് നടനെ ലക്ഷ്യമിടുന്ന പ്രവണത അവസാനിക്കണമെന്നും അദ്ദേഹം പറഞ്ഞു.
കഴിഞ്ഞ ദിവസം മമ്മൂട്ടിയെ സന്ദർശിച്ച എസ്‌എഫ്‌ഐ, ഡിവൈഎഫ്‌ഐ നേതാക്കളെ രൂക്ഷമായി വിമർശിച്ചാണ് ഒരു വിഭാഗം സൈബർ അണികള്‍ സമൂഹമാധ്യമങ്ങളില്‍ രംഗത്തെത്തിയത്. സിപിഎം വയനാട് ജില്ലാ സെക്രട്ടറി കെ. റഫീഖിന്റെ ചിത്രം വ്യാപകമായി പങ്കുവെച്ചുകൊണ്ടായിരുന്നു അണികളുടെ പരസ്യ പ്രതിഷേധം. എന്നാല്‍ സൈബർ ആക്രമണം അവസാനിപ്പിക്കണമെന്ന പി. ജയരാജന്റെ ശക്തമായ തിരുത്തലിന് താഴെയും സൈബർ കേന്ദ്രങ്ങളില്‍നിന്ന് കടുത്ത വിമർശനങ്ങളാണ് ഉയരുന്നത്.
പി ജയരാജിൻറെ പോസ്റ്റിൻറെ പൂർണ്ണ രൂപം:
മലയാളത്തിന്റെ അഭിമാനമായ മഹാനടൻ മമ്മൂട്ടിയെയും അദ്ദേഹത്തെ സന്ദർശിച്ച ഡിവൈഎഫ്‌ഐ, എസ്‌എഫ്‌ഐ നേതാക്കളെയും ലക്ഷ്യമിട്ട് സോഷ്യല്‍ മീഡിയയില്‍ നടക്കുന്ന സൈബർ ആക്രമണങ്ങള്‍ അത്യന്തം അപലപനീയമാണ്.
വയനാട് ദുരന്തവുമായി ബന്ധപ്പെട്ട് മുൻപുണ്ടായ ഒരു വിഷയം അന്നുതന്നെ പരസ്പരം സംസാരിച്ച്‌ പൂർണ്ണമായും പരിഹരിക്കപ്പെട്ട ഒന്നാണ്. സിപിഐ(എം) വയനാട് ജില്ലാ സെക്രട്ടറി സഖാവ് റഫീഖും മമ്മൂട്ടിയും തമ്മിലുള്ള സൗഹൃദവും ആത്മബന്ധവും പൊതുസമൂഹത്തിന് മുന്നിലുള്ളതുമാണ്. തീർന്നുപോയ ഒരു തെറ്റിദ്ധാരണയെ വീണ്ടും കുത്തിപ്പൊക്കി, ആ മഹാനടനെ നിരന്തരം വേട്ടയാടാനും അധിക്ഷേപിക്കാനും ചില കേന്ദ്രങ്ങള്‍ ശ്രമിക്കുന്നത് നിക്ഷിപ്ത താല്പര്യങ്ങളോടെയാണ്
മമ്മൂട്ടി ഒരു രാഷ്ട്രീയ പാർട്ടിയുടെയും ചട്ടക്കൂടില്‍ ഒതുങ്ങിനില്‍ക്കുന്ന വ്യക്തിയല്ല; ഈ നാടിന്റെയാകെ പൊതുസ്വത്താണ്. അദ്ദേഹത്തെ കാണുന്നതും സൗഹൃദം പങ്കുവെക്കുന്നതും ഏതെങ്കിലും രാഷ്ട്രീയ ചേരിതിരിവിന്റെ അടിസ്ഥാനത്തില്‍ അളക്കേണ്ട ഒന്നല്ല. പുരോഗമന വിദ്യാർത്ഥി-യുവജന പ്രസ്ഥാനങ്ങളുടെ നേതാക്കള്‍, അദ്ദേഹത്തിന്റെ ക്ഷണം സ്വീകരിച്ച്‌ സന്ദർശിച്ചതിനെപ്പോലും വിവാദമാക്കുന്നത് സങ്കുചിത രാഷ്ട്രീയ ബോധമാണ്. ദേശീയ തലത്തില്‍ ജനാധിപത്യത്തിനുവേണ്ടിയും കാവിവത്കരണത്തിനെതിരെയും പൊരുതി അംഗീകാരം നേടിയ ഡി. വൈ. എഫ്. ഐ – എസ്.എഫ്.ഐ നേതാക്കളെ കാണാൻ ആഗ്രഹിച്ചതുതന്നെ ഈ സംഘടനകള്‍ക്കുള്ള വലിയ അംഗീകാരമാണ്.
ഇടതുപക്ഷത്തിന്റെ ലേബലില്‍ നിന്നുകൊണ്ട് ഇത്തരം വ്യക്തിഹത്യകള്‍ക്ക് നേതൃത്വം കൊടുക്കുന്നത് ആരായാലും അത് ഇടതുപക്ഷ രാഷ്ട്രീയമല്ല. രാഷ്ട്രീയ ശത്രുക്കള്‍ക്ക് അവസരമൊരുക്കാനും തെറ്റിദ്ധാരണകള്‍ സൃഷ്ടിക്കാനും ചിലർ നടത്തുന്ന അജണ്ട തിരിച്ചറിയപ്പെടേണ്ടതുണ്ട്.
കലയെയും കലാകാരന്മാരെയും ചേർത്തുപിടിക്കുന്നതാണ് കമ്യൂണിസ്റ്റ് സംസ്കാരം. തെറ്റായ പ്രചാരണങ്ങളില്‍ പെട്ടുപോയിട്ടുള്ളവർ അതില്‍നിന്ന് പിന്തിരിയണം. മലയാളത്തിന്റെ മഹാനടനെതിരെയുള്ള അനാവശ്യമായ സൈബർ ആക്രമണങ്ങള്‍ അവസാനിപ്പിക്കണം
SUMMARY: “Mammootty is not an individual who fits within the confines of any political party; the cyberattacks must stop”: P. Jayarajan
