ബെംഗളൂരു: കർണാടകയിലെ യാദ്ഗീർ ജില്ലയിലെ സൂറത്ത്-ചെന്നൈ എക്സ്പ്രസ് വേയിൽ നിർമ്മാണത്തിലിരിക്കുന്ന പാലത്തിലേക്ക് കാറിടിച്ചു കയറി നാല് യുവാക്കൾ ദാരുണമായി മരിച്ചു. കർണാടകയിലെ യാദ്ഗിർ ജില്ലക്കാരായ ഗുരുരാജ് സുരേഷ് ചവാൻ (29), റെഡ്ഡി ബഗ്ല റാത്തോഡ് (33), ഗോവിന്ദ സീതയ്യ ചവാൻ (28), കുമാർ രാമു റാത്തോഡ് (26) എന്നിവരാണ് മരിച്ചത്. ഷാഹാപൂർ താലൂക്കിലെ ഇബ്രാഹിംപുരിന് സമീപമാണ് അപകടം.
മഹാരാഷ്ട്രയിലെ തുൽജാപ്പൂർ ഭവാനി ദേവി ക്ഷേത്രത്തിൽ ദർശനം നടത്തി സ്വന്തം നാട്ടിലേക്ക് മടങ്ങിവരവേയായിരുന്നു അപകടമെന്ന് പൊലീസ് അറിയിച്ചു. ഡ്രൈവർക്ക് വാഹനത്തിന്റെ നിയന്ത്രണം നഷ്ടമായതോടെ കാർ പാലത്തിന്റെ നിർമാണഭാഗത്തേക്ക് ഇടിച്ചുകയറുകയായിരുന്നു. അപകടത്തിൽ രണ്ട് പേർ സംഭവസ്ഥലത്തുതന്നെ മരിച്ചു. ഗുരുതരമായി പരുക്കേറ്റ മറ്റ് രണ്ട് പേരെ ആശുപത്രിയിൽ പ്രവേശിപ്പിച്ചെങ്കിലും രക്ഷപ്പെടുത്താനായില്ല. അപകടത്തിൽ കാർ പൂർണ്ണമായി തകർന്നു. ഷാഹാപൂർ പോലീസ് സ്റ്റേഷനിൽ കേസ് രജിസ്റ്റർ ചെയ്തിട്ടുണ്ടെന്നും അന്വേഷണം പുരോഗമിക്കുകയാണെന്നും അധികൃതർ അറിയിച്ചു.
SUMMARY:A car crashes into a bridge under construction; Four youths died
