ബെംഗളൂരു: ബാംഗ്ലൂർ ക്ലബ് ഫോർ കഥകളി ആൻഡ് ദി ആർട്സിന്റെയും (ബി.സി.കെ.എ.), കൈരളീ കലാ സമിതിയുടെയും ആഭിമുഖ്യത്തിൽ നടത്തിവരുന്ന കഥകളി വേഷ പഠന കളരിയിലെ വിദ്യാർഥികളുടെ കഥകളി അവതരണം ശനിയാഴ്ച വിമാനപുര കൈരളീ നിലയം സ്കൂളിൽ നടക്കും.
വൈകിട്ട് 5.30 യ്ക്ക് ആരംഭിക്കുന്ന കഥകളിയിൽ ഉത്തരാസ്വയംവരം, സുഭദ്രാഹരണം, ലവണാസുരവധം, ഗീതോപദേശം എന്നീ നാലു കഥകളിലെ പ്രധാന ഭാഗങ്ങൾ അവതരിപ്പിക്കും. അരുന്ധതി ടി എസ്, നിവേദിതാ പണിക്കർ, ധന്യ സുദേവ്, ആകാശ് നരസിപുർ, രതി നായർ, ശ്രീഹരി മനു, കാർത്തിക് ആര് നായർ, ഡോ. ലീലാ രാമചന്ദ്രൻ, ദൈവിക് ആര് നായർ, അക്ഷോഭ് എസ് പണിക്കർ, വിദ്യ പ്രഭ, ഗൗരി പാർവതി പാലശ്ശേരി എന്നിവർ അരങ്ങിലെത്തും. അഭിജിത് വർമ്മ, നവീൻ രുദ്രൻ എന്നിവർ സംഗീതവും, കലാമണ്ഡലം സുഹാസ് ചെണ്ടയും, കലാമണ്ഡലം ശ്രീജിത്ത് മദ്ദളവും കൈകാര്യം ചെയ്യും, കൂടാതെ കേരളത്തിൽ നിന്നും എത്തുന്ന മറ്റു പതിനൊന്നോളം കലാകാരന്മാരും കഥകളിയിൽ പങ്കെടുക്കും.
ബാംഗ്ലൂർ സെൻട്രൽ എംപി പിസി മോഹൻ മുഖ്യാതിഥിയായിരിക്കും. മുൻ ഐഎസ്ആർഒ. ചെയർമാൻ ഡോ. കെ രാധാകൃഷ്ണൻ, വിജയ് പ്രസാദ് തുടങ്ങിയ പ്രമുഖർ അതിഥികളായെത്തും. കൈരളീ കലാ സമിതി പ്രസിഡൻറ് സുധാകരൻ രാമന്തളി, ജനറൽ സെക്രട്ടറി പി കെ സുധീഷ്, ബി.സി.കെ.എ വൈസ് പ്രസിഡന്റ് മീനാദാസ് നാരായൺ തുടങ്ങിയവർ ചടങ്ങിൽ പങ്കെടുക്കും.
വേഷ വിഭാഗത്തിലെ പ്രമുഖ വനിതാ സാന്നിധ്യമായ കഥകളി കലാകാരി കലാക്ഷേത്രം പ്രിയാ നമ്പൂതിരിയാണ് പഠന കളരി നയിക്കുന്നത്. കലാമണ്ഡലം സി ഗോപാലകൃഷ്ണൻ ആണ് ഗുരു. കേരളത്തിന്റെ സ്വന്തം ശാസ്ത്രീയ കലാരൂപമായ കഥകളിയുടെ ബെംഗളൂരുവിലെ പഠനകളരിയ്ക്ക് നഗരത്തിലെ മലയാളികളിൽ നിന്ന് നല്ല പ്രതികരണം ലഭിക്കുന്നു. കൈരളീ നിലയം സ്കൂൾ കൂടാതെ ബെംഗളൂരുവിലെ മറ്റു ഭാഗങ്ങളിലും കഥകളി ക്ലാസുകൾ തുടങ്ങിയിട്ടുണ്ട്.
കൂടുതൽ വിവരങ്ങൾക്ക് ബന്ധപെടുക – 6364909800/9845439090
