തൃശൂർ: ‘സാംസ്കാരിക നായിക’ എന്ന വിശേഷണം തനിക്ക് ചാർത്തേണ്ടതില്ലെന്ന് പ്രശസ്ത എഴുത്തുകാരി സാറാ ജോസഫ്. ഈ പ്രയോഗത്തിൽ നിന്ന് തന്നെ ഒഴിവാക്കണമെന്നും മാധ്യമപ്രവർത്തകർ ഉൾപ്പെടെയുള്ളവർ അത്തരമൊരു വിളിപ്പേര് ഉപയോഗിക്കരുതെന്നും ഫേസ്ബുക്ക് കുറിപ്പിലൂടെ അവർ അഭ്യർത്ഥിച്ചു. നിലവിൽ ഈ വിശേഷണം പ്രയോഗിക്കപ്പെടുന്ന രീതിയോടുള്ള വിയോജിപ്പാണ് പ്രതികരണത്തിന് പിന്നിലെന്നും വ്യക്തമാക്കി.
താൻ ഒരു എഴുത്തുകാരി മാത്രമാണെന്നും ആരുടെയും നായികയാകാൻ ആഗ്രഹിക്കുന്നില്ലെന്നും സാറാ ജോസഫ് പറഞ്ഞു. സമൂഹത്തിലെ മറ്റേതൊരു വ്യക്തിയെയും പോലെ ശരിയെന്ന് തോന്നുന്ന വിഷയങ്ങളിൽ തന്റെ നിലപാടുകൾ തുറന്നുപറഞ്ഞിട്ടുണ്ട്. വിവിധ കൂട്ടായ്മകൾ പിന്തുണ തേടി മുന്നോട്ടുവയ്ക്കുന്ന പ്രസ്താവനകളോട് പൂർണമായി യോജിപ്പുണ്ടാകുകയും അവ ശരിയാണെന്ന് ബോധ്യപ്പെടുകയും ചെയ്യുമ്പോൾ മാത്രമാണ് താൻ അവർക്കൊപ്പം ചേർന്നിട്ടുള്ളതെന്നും അവർ കുറിച്ചു.
സാറാ ജോസഫിൻറെ ഫേസ്ബുക്ക് പോസ്റ്റിൻറെ പൂർണ്ണ രൂപം
പ്രിയരേ,പ്രിയ മാധ്യമസുഹൃത്തുക്കളേ,
എൻ്റെ മേൽ അടിച്ചേല്പിക്കപ്പെട്ടിട്ടുള്ളതും ഞാൻ സ്വീകരിച്ചിട്ടില്ലാത്തതുമായ”സാംസ്കാരിക നായിക”എന്ന പൊല്ലാപ്പിൽ നിന്ന് ദയവായി എന്നെ ഒഴിവാക്കണം.
ഞാൻ ഒരു എഴുത്തുകാരി മാത്രമാണ്.ഏതൊരു സമൂഹജീവിയെയും പോലെ എനിക്ക് ശരിയെന്നുതോന്നുന്ന കാര്യങ്ങൾ ഉറക്കെ പറഞ്ഞിട്ടുണ്ട്. കൂട്ടഒപ്പിടീക്കൽ പ്രസ്ഥാനക്കാർ കൊണ്ടുവരുന്ന പ്രസ്താവനകൾ ബോധ്യപ്പെട്ടാൽ അവരോട് ഐക്യപ്പെട്ട് ഒപ്പിടാറുണ്ട്.(ശരിയെന്ന് തോന്നുന്നത് മാത്രം.ബോധ്യപ്പെടുന്നത് മാത്രം.)
മാധ്യമസുഹൃത്തുക്കളെങ്കിലും എന്നെ”സാംസ്കാരികനായിക” എന്ന തെറിവാക്ക് (ഇന്ന് അത് അങ്ങനെയാണ് ഉപയോഗിക്കപ്പെടുന്നത് എന്നറിയാമല്ലോ.)വിളിയ്ക്കരുതെന്ന് അഭ്യർത്ഥിക്കുന്നു. ഞാൻ ഒന്നിൻ്റെയും നായികയല്ല.
SUMMARY: ‘No one should call me a cultural icon’; Sara Joseph offers a justification following criticisms
