ബെംഗളൂരു: ലുലു മാള്‍ ബെംഗളൂരു സിറ്റി പോലീസിന്റെ സഹകരണത്തോടെ ‘ബേഡ ബ്രോ, സേ നോ ടു ഡ്രഗ്സ്’ എന്ന പേരിൽ ലഹരിവിരുദ്ധ ബോധവത്കരണ കാമ്പയിൻ സംഘടിപ്പിച്ചു. നഗരത്തിലെ യുവാക്കള്‍ക്കും പൊതുജനങ്ങള്‍ക്കും ലഹരിവസ്തുക്കളുടെ ദോഷങ്ങളെക്കുറിച്ച് ബോധവത്കരണം നല്‍കുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്.
പോലീസ് ഡെപ്യൂട്ടി കമീഷണർ എൻ. യതീഷ് (ഐ.പി.എസ്) മുഖ്യാതിഥിയായിരുന്നു. വി.എസ്. ബൂത്തേഗൗഡ, ശങ്കരഗൗഡ ബസനഗൗഡർ, ലുലു ഗ്രൂപ്പ് കർണാടക ജീവനക്കാർ, പൊതുജനങ്ങൾ എന്നിവർ പങ്കെടുത്തു. ലുലു ഗ്രൂപ് കർണാടക ഡയറക്ടർ നോമൻ അസീസ് ഖാൻ, ലുലു ഗ്രൂപ്പ് കർണാടക റീജിയണൽ മാനേജർ കെ.പി. ജമാൽ എന്നിവർ പ്രമുഖരെ ആദരിച്ചു.
ഗവൺമെന്‍റ് ഹോമിയോപ്പതി മെഡിക്കൽ കോളജ് ആശുപത്രിയിലെയും ഗവേഷണ കേന്ദ്രത്തിലെയും വിദ്യാര്‍ഥികള്‍ പരിപാടിക്ക് പിന്തുണ നൽകി. മുഖ്യാതിഥികളും ലുലു പ്രമുഖരും ലഹരിവിരുദ്ധ ബോധവൽക്കരണ റാലി ഫ്ലാഗ് ഓഫ് ചെയ്തു.
കാമ്പെയ്നിന്റെ പ്രധാന ആകർഷണം രാജാജിനഗറിനു ചുറ്റുമുള്ള പ്രധാന റോഡുകളിലൂടെ 5 കിലോമീറ്റർ ബോധവൽക്കരണ റാലിയായിരുന്നു. പങ്കെടുത്തവർ പ്ലക്കാർഡുകളും മുദ്രാവാക്യങ്ങളുമായി ലഹരിവിരുദ്ധ സന്ദേശം ഉയർത്തി. മാളിന്റെ പരിസരത്തുള്ള താമസക്കാറെയും കടക്കാരെയും വഴിയാത്രക്കാരെയും ലഹരിരഹിത ബെംഗളൂരുവിനായുള്ള പ്രതിജ്ഞയിൽ പങ്കാളികളാക്കി. വോളന്റിയർമാർ ബോധവൽക്കരണ ലഘുലേഖകൾ വിതരണം ചെയ്യുകയും കാമ്പെയ്നിന്റെ സന്ദേശങ്ങൾ കൈമാറുകയും ചെയ്തു.
SUMMARY: ‘Bedda Bro’ – Lulu holds anti-drug awareness rally in Bengaluru
