കോഴിക്കോട്: പുഴയിൽ കുളിക്കാനിറങ്ങിയ രണ്ട് കുട്ടികളിൽ ഒരാൾ മുങ്ങിമരിച്ചു. ചാത്തമംഗലം പാലാട്ടുമ്മൽ ഷമീറിന്റെ മകൻ സനു ഫിയാസ് (13) ആണ് മരിച്ചത്. ചോയിമഠം ചെറുപുഴയിൽ ഉച്ചയ്ക്ക് രണ്ടരയോടെയാണ് അപകടമുണ്ടായത്.
ചാത്തമംഗലത്തെ സനു ഫിയാസിന്റെ വീട്ടിലെത്തിയ ശേഷമാണ് രണ്ട് വിദ്യാർഥികളും സമീപത്തെ പുഴയിൽ കുളിക്കാനിറങ്ങിയത്. ഇതിനിടെ കുട്ടികളുടെ ബഹളം കേട്ട് സംഭവസ്ഥലത്തിന് തൊട്ടടുത്ത് താമസിക്കുന്ന മഹാരാഷ്ട്ര സ്വദേശികൾ ഓടിയെത്തുകയായിരുന്നു. മുങ്ങിപ്പോയ ഒരു കുട്ടിയെ ഇവർ രക്ഷപ്പെടുത്തി. എന്നാൽ സനു ഫിയാസിനെ രക്ഷിക്കാനായില്ല.
തുടർന്ന് മുക്കം അഗ്നിരക്ഷാ സേനയെ വിവരമറിയിച്ചു. ഫയർ ഫോഴ്‌സ് യൂണിറ്റ് സ്ഥലത്തെത്തി ഏറെനേരം നടത്തിയ തിരച്ചിലിനൊടുവിലാണ് സനു ഫിയാസിന്റെ മൃതദേഹം കണ്ടെത്തിയത്. മൃതദേഹം കോഴിക്കോട് മെഡിക്കൽ കോളേജ് മോർച്ചറിയിലേക്ക് മാറ്റി.
പുഴയിൽ കുളിക്കാനിറങ്ങിയ കുട്ടികൾ അപകടത്തിൽപ്പെട്ടതിനെ തുടർന്ന് നാട്ടുകാരുടെയും രക്ഷാപ്രവർത്തകരുടെയും ഇടപെടലിലാണ് ഒരുകുട്ടിയെ രക്ഷിക്കാനായത്. എന്നാൽ സനു ഫിയാസിന്റെ ജീവൻ രക്ഷിക്കാനായില്ല.
SUMMARY: Student drowns while bathing in Kozhikode; another child caught in the current rescued.
