ന്യൂഡല്‍ഹി: മുഖ്യ തിരഞ്ഞെടുപ്പ് കമ്മിഷണര്‍ ഗ്യാനേഷ് കുമാറിന്റെ രാജിആവശ്യപ്പെട്ട് കോക്രോച്ച് ജനത പാര്‍ട്ടി (സിജെപി) ഡല്‍ഹി ജന്തര്‍ മന്തറില്‍ ഇന്ന് നടത്താനിരുന്ന പ്രക്ഷോഭത്തിന് മുന്നോടിയായി ഡല്‍ഹിയിലും വിവിധ സംസ്ഥാനങ്ങളിലുമായി വന്‍തോതില്‍ പ്രതിഷേധക്കാരെ പോലീസ് കസ്റ്റഡിയിലെടുത്തു. ഡല്‍ഹിയില്‍ മാത്രം ജന്തര്‍ മന്തറിലേക്ക് എത്തുന്നതിന് മുന്‍പായി 600-ലധികം പ്രതിഷേധക്കാരെ കരുതല്‍ തടങ്കലില്‍ ആക്കിയിട്ടുണ്ട്. പ്രമുഖ സോഷ്യല്‍ മീഡിയ ഇന്‍ഫ്‌ലുവന്‍സറും യൂട്യൂബറുമായ ധ്രുവ് റാഠിയെ ഗുരുഗ്രാമിലെ വസതിയില്‍ വെച്ച് പോലീസ് കസ്റ്റഡിയിലെടുത്തു. സിജെപി ലീഗല്‍ വിഭാഗം തലവന്‍ രത്‌ന സിംഗും ഡല്‍ഹിയിലെ വസതിയില്‍ വെച്ച് തടങ്കലിലായി. മുംബൈയില്‍നിന്ന് ഡല്‍ഹി വിമാനത്താവളത്തിലെത്തിയ അഭിജിത് ദീപ്‌കെയെ തടയാനും ശ്രമമുണ്ട്.
സമാനതകളില്ലാത്ത സുരക്ഷാക്രമീകരണങ്ങളാണ് രാജ്യതലസ്ഥാനത്ത് ഏര്‍പ്പെടുത്തിയിരിക്കുന്നത്. പ്രക്ഷോഭത്തിന് ഡല്‍ഹി പോലീസ് അനുമതി നിഷേധിച്ചിരുന്നു. പ്രദേശത്ത് നിലവില്‍ BNSS സെക്ഷന്‍ 163 (നിരോധനാജ്ഞ) ഏര്‍പ്പെടുത്തിയിട്ടുണ്ട്. ജന്തര്‍ മന്തറും പരിസര പ്രദേശങ്ങളും വന്‍ സുരക്ഷാ കോട്ടയാക്കി മാറ്റിയിരിക്കുകയാണ്. ഏകദേശം 35,000-ത്തോളം സുരക്ഷാ ഉദ്യോഗസ്ഥരെയാണ് ഡല്‍ഹിയില്‍ വിന്യസിച്ചിരിക്കുന്നത്. നിരീക്ഷണത്തിനായി ഡ്രോണുകളും പ്രത്യേക സിസിടിവി ക്യാമറകളും സ്ഥാപിച്ചു. രാജീവ് ചൗക്ക്, സെന്‍ട്രല്‍ സെക്രട്ടേറിയറ്റ് ഉള്‍പ്പെടെ 45-ഓളം മെട്രോ സ്റ്റേഷനുകള്‍ അടയ്ക്കുകയും ഡല്‍ഹിയിലേക്കുള്ള 250-ഓളം ട്രെയിനുകള്‍ റദ്ദാക്കുകയും ചെയ്തിട്ടുണ്ട്. ജന്തര്‍ മന്ദിറിന് ചുറ്റുമുള്ള 4 കിലോമീറ്റര്‍ ചുറ്റളവില്‍ മൊബൈല്‍ ഇന്റര്‍നെറ്റ് സേവനങ്ങള്‍ താല്‍ക്കാലികമായി വിച്ഛേദിച്ചിട്ടുണ്ട്.
അതേസമയം കടുത്ത നിയന്ത്രണങ്ങള്‍ക്കിടയിലും തങ്ങളുടെ പ്രവര്‍ത്തകര്‍ ജന്തര്‍ മന്തിറിലേക്ക് മാര്‍ച്ച് ചെയ്യുമെന്ന് സിജെപി സ്ഥാപകന്‍ അഭിജീത് ദിപ്‌കെ വ്യക്തമാക്കി. സര്‍ക്കാരിന്റെ ഈ അടിച്ചമര്‍ത്തല്‍ നടപടിയെ ‘അപ്രഖ്യാപിത അടിയന്തരാവസ്ഥ’ എന്നാണ് സിജെപി നേതാക്കള്‍ വിശേഷിപ്പിച്ചത്. സിജെപിക്ക് പിന്തുണയുമായി എത്തിയ എസ്എഫ്ഐ (SFI) പ്രവര്‍ത്തകരെ കണ്ടെത്താന്‍ ഡല്‍ഹിയിലെ സിപിഐഎം ഓഫീസുകളിലും പോലീസ് തിരച്ചില്‍ നടത്തി.
SUMMARY: CJP Protest: Protesters being taken into custody in Delhi.
