കാസറഗോഡ്: ചെറുവത്തൂർ മട്ടലായിൽ ദേശീയപാതയിൽ വലിയ രീതിയിലുള്ള വിള്ളൽ രൂപപ്പെട്ടു. മട്ടലായി ശിവക്ഷേത്രത്തിന് സമീപമാണ് ഏകദേശം 50 മീറ്ററിലധികം വിള്ളൽ കണ്ടെത്തിയത്. ശനിയാഴ്ച രാത്രി പെയ്ത കനത്ത മഴയെത്തുടർന്നാണ് അപകടകരമായ രീതിയിൽ വിള്ളലുണ്ടായത്. സംഭവമറിഞ്ഞ ഉടൻ തന്നെ വിള്ളൽ അടയ്ക്കാനുള്ള അടിയന്തര നടപടികൾ അധികൃതർ ആരംഭിച്ചിട്ടുണ്ട്.
അതേസമയം, കേരളത്തിൽ വരും ദിവസങ്ങളിൽ വേനൽ മഴ കൂടുതൽ ശക്തമാകുമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. ഇന്ന് ഏഴ് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. അറബിക്കടലിന് മുകളിലെ ചക്രവാതച്ചുഴിയും ബംഗാൾ ഉൾക്കടലിൽ രൂപപ്പെടാൻ സാധ്യതയുള്ള ന്യൂനമർദ്ദവും കാരണം അടുത്ത അഞ്ച് ദിവസം കൂടി സംസ്ഥാനത്ത് പരക്കെ മഴ തുടരും. ഒറ്റപ്പെട്ടയിടങ്ങളിൽ ശക്തമായ മഴയ്ക്ക് സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്ന് അധികൃതർ നിർദ്ദേശിച്ചു.
SUMMARY: Crack in the national highway in Cheruvathur
