ബെംഗളൂരു: കർണാടകയിൽ വരൾച്ചയെ തുടർന്ന് കൃഷിനാശം നേരിട്ട കർഷകർക്ക് പ്രഖ്യാപിച്ച 5,000 രൂപ ധനസഹായത്തിന്റെ ആദ്യ ഗഡുവായ 2,500 രൂപ വിതരണം ആരംഭിച്ചു. ശേഷിക്കുന്ന 2,500 അടുത്ത മൂന്നാഴ്ചയ്ക്കുള്ളിൽ വിതരണം ചെയ്യുമെന്ന് സംസ്ഥാന സർക്കാർ അറിയിച്ചിട്ടുണ്ട്.
സംസ്ഥാനത്തെ 226 താലൂക്കുകളെയാണ് വരൾച്ചബാധിതമായി പ്രഖ്യാപിച്ചിട്ടുള്ളത്. കൃഷിനാശം മൂലം വലിയ സാമ്പത്തിക പ്രതിസന്ധി നേരിടുന്ന കർഷകർക്ക് അടിയന്തര സഹായം എത്തിക്കുകയാണ് പദ്ധതിയുടെ ലക്ഷ്യം.കേന്ദ്ര സർക്കാരിൽനിന്ന് വരൾച്ചാ ദുരിതാശ്വാസമായി 22,400.58 കോടി ആവശ്യപ്പെട്ടിട്ടുണ്ടെന്നും സംസ്ഥാന സർക്കാർ വ്യക്തമാക്കിയിട്ടുണ്ട്. സംസ്ഥാനത്തെ കൃഷിനാശം ഏകദേശം 62,000 കോടി വരുമെന്നാണ് സർക്കാർ കണക്കാക്കുന്നത്.
യാദ്ഗിർ ജില്ലയിൽ മാത്രം 1,06,462 കർഷകർക്ക് ആദ്യ ഗഡുവായി 17.43 കോടി വിതരണം ചെയ്തിട്ടുണ്ട്. മഴക്കുറവും വിളനാശവും മൂലം പ്രതിസന്ധിയിലായ കർഷകർക്ക് ഈ ധനസഹായം ചെറിയ ആശ്വാസമാകും.
SUMMARY: Drought; Rs 5,000 financial assistance to farmers who faced crop damage; The distribution of the first installment has started
