തിരുവനന്തപുരം: സംസ്ഥാനത്ത് മയക്കുമരുന്ന് കച്ചവടവും ഉപയോഗവും തടയാൻ ലക്ഷ്യമിട്ട് ആരംഭിച്ച ‘ഓപ്പറേഷൻ തൂഫാൻ’ മികച്ച ജനകീയ പങ്കാളിത്തത്തോടെ മുന്നേറുന്നതായി നോഡൽ ഓഫീസർ ഐ.ജി. പുട്ട വിമലാദിത്യ പത്രസമ്മേളനത്തിൽ അറിയിച്ചു. നടപടി അഞ്ചുമാസം പിന്നിടുമ്പോള്‍ ഇതുവരെ 15,515 പേര്‍ അറസ്റ്റിലായി. 14,369 കേസുകളാണ് രജിസ്റ്റര്‍ ചെയ്തത്. അറസ്റ്റിലായവരില്‍ 1,173 പേരെ റിമാന്‍ഡ് ചെയ്തു. ഐ.ജി. പുട്ട വിമലാദിത്യ വ്യക്തമാക്കി. ഓപ്പറേഷൻ ആരംഭിച്ചതിനുശേഷം 8,125 പരാതികൾ ഫോൺ വഴിയും 5,668 പരാതികൾ വാട്സാപ്പിലൂടെയും ലഭിച്ചിട്ടുണ്ട്. ഇതിനുപുറമേ ആഭ്യന്തരമന്ത്രിയുടെ ഓഫീസിലേക്കും നിരവധിയായ പരാതികൾ എത്തുന്നുണ്ട്.
ലഹരിക്കടത്തിലൂടെ നിയമവിരുദ്ധമായി സമ്പാദിച്ച 40 പേരുടെ സ്വത്ത് കണ്ടുകെട്ടാനുള്ള നടപടികൾക്ക് പോലീസ് തുടക്കമിട്ടു. ഇതിന്റെ ഭാഗമായി 148 ബാങ്ക് അക്കൗണ്ടുകൾ മരവിപ്പിക്കുകയും 186 വാഹനങ്ങളും 801 മൊബൈൽ ഫോണുകളും കസ്റ്റഡിയിലെടുക്കുകയും ചെയ്തിട്ടുണ്ട്.
വിദേശത്തുനിന്ന് ഇന്ത്യയിലേക്ക് ലഹരി കടത്തുന്ന പ്രധാനികളെ തിരിച്ചറിഞ്ഞിട്ടുണ്ട്. ഇതിൽ നാലുപേർക്കെതിരെ റെഡ് കോർണർ നോട്ടീസും ഒരാൾക്കെതിരെ ബ്ലൂ കോർണർ നോട്ടീസും പത്തുപേർക്കെതിരെ ലുക്ക് ഔട്ട് നോട്ടീസും പുറപ്പെടുവിച്ചിട്ടുണ്ട്. ഇന്റർപോളിന്റെ സഹായത്തോടെ ഇവരെ ഉടൻ പിടികൂടാനുള്ള നടപടികളാണ് പുരോഗമിക്കുന്നത്.
ലഹരിയുമായി ബന്ധപ്പെട്ട കുറ്റകൃത്യങ്ങൾ ആവർത്തിക്കാതിരിക്കാൻ രണ്ടായിരത്തഞ്ഞൂറോളം (2,500) വ്യക്തികളുടെ വിവരങ്ങൾ ശേഖരിക്കുകയും ഇവരെ നിലവിൽ കർശന നിരീക്ഷണത്തിലാക്കുകയും ചെയ്തിട്ടുണ്ടെന്നും ഐ.ജി. വ്യക്തമാക്കി.
SUMMARY: Five months for Operation Tufan; 15,515 people arrested, 14,369 cases, property of 40 people confiscated
