ബെംഗളൂരു: സംസ്ഥാനത്തെ റെയിൽവേ സ്റ്റേഷനുകളിലെ ഭക്ഷണശാലകളിലും കാന്റീനുകളിലും നടത്തിയ പ്രത്യേക ഭക്ഷ്യസുരക്ഷാ പരിശോധനയിൽ കാലാവധി കഴിഞ്ഞ പാൽ, തൈര്, ശുചിത്വമില്ലാത്ത ഭക്ഷ്യസംഭരണം, അനുവദനീയമല്ലാത്ത ഭക്ഷ്യനിറങ്ങളുടെ ഉപയോഗം തുടങ്ങിയ നിരവധി ലംഘനങ്ങൾ കണ്ടെത്തി.
സംസ്ഥാനത്തെ 36 റെയിൽവേ സ്റ്റേഷനുകളിലെ 112 ഭക്ഷ്യസ്ഥാപനങ്ങളിലാണ് പരിശോധന നടത്തിയത്. ഹോട്ടലുകൾ, കാന്റീനുകൾ, ഭക്ഷണ സ്റ്റാളുകൾ, ട്രെയിനുകളിലെ പാൻട്രി കാറുകൾ, റെയിൽവേ പരിസരത്തെ ഭക്ഷണം തയ്യാറാക്കുന്ന യൂണിറ്റുകൾ എന്നിവ പരിശോധനയുടെ പരിധിയിൽ ഉൾപ്പെട്ടു.
പരിശോധനയിൽ പത്രക്കടലാസിൽ പൊതിഞ്ഞ വടയും മറ്റ് ഭക്ഷണങ്ങളും, കാർഡ്ബോർഡ് പെട്ടികളിൽ സൂക്ഷിച്ച സമോസകൾ, ഭക്ഷ്യസംഭരണത്തിന് അനുയോജ്യമല്ലാത്ത പ്ലാസ്റ്റിക് ബക്കറ്റുകളിൽ സൂക്ഷിച്ച ചട്ണി എന്നിവ കണ്ടെത്തി. ചില സ്ഥാപനങ്ങളിൽ ഭക്ഷ്യവസ്തുക്കൾക്ക് ആവശ്യമായ ലേബലിങ് വിവരങ്ങളും രജിസ്ട്രേഷൻ സർട്ടിഫിക്കറ്റുകളും ശരിയായി പ്രദർശിപ്പിച്ചിരുന്നില്ല.
ഹാവേരി ജില്ലയിലെ ഒരു റെയിൽവേ സ്റ്റേഷനിൽ കാലാവധി കഴിഞ്ഞ നന്ദിനി തൈരും ഡോഡ്ല സ്റ്റാൻഡേർഡൈസ്ഡ് പാലും കണ്ടെത്തി. മറ്റ് ചില സ്ഥാപനങ്ങളിലും കാലാവധി കഴിഞ്ഞ ഭക്ഷ്യവസ്തുക്കൾ കണ്ടെത്തിയതായി പരിശോധനാ സംഘം അറിയിച്ചു.
ഭക്ഷണത്തിലെ അനുവദനീയമല്ലാത്ത നിറങ്ങളുടെ ഉപയോഗവും പരിശോധനയിൽ സംശയിക്കപ്പെട്ടു. ജിലേബിയിൽ മഞ്ഞ നിറവും ഖോവ പേടയിൽ പിങ്ക് നിറവും ഉപയോഗിച്ചതായി കണ്ടെത്തി. കൂടാതെ ചിലയിടങ്ങളിൽ ഉള്ളിയിലും പച്ചക്കറികളിലും പൂപ്പൽ കണ്ടെത്തി.
ബെംഗളൂരുവിലെ കെ.ആർ. പുര റെയിൽവേ സ്റ്റേഷനിലെ ഒരു ഭക്ഷണശാലയിൽ ശുചിത്വമില്ലാത്ത സാഹചര്യം കണ്ടെത്തി. മൈസൂരു റെയിൽവേ സ്റ്റേഷനിലെ ചില ഭക്ഷണം തയ്യാറാക്കുന്ന യൂണിറ്റുകളിൽ പ്ലാസ്റ്റിക് ഉപയോഗിച്ച് ഇഡ്ലി തയ്യാറാക്കുന്നതായും പരിശോധനയിൽ കണ്ടെത്തി. അതേസമയം ഹുബ്ബള്ളിയിലെ വന്ദേ ഭാരത് ക്ലസ്റ്റർ കിച്ചൻ വൃത്തിയുള്ള നിലയിലായിരുന്നുവെന്ന് അധികൃതർ അറിയിച്ചു.
നിയമലംഘനം കണ്ടെത്തിയ ഭക്ഷ്യസ്ഥാപനങ്ങൾക്കെതിരെ തുടർ നിയമനടപടി സ്വീകരിക്കുമെന്ന് ഭക്ഷ്യസുരക്ഷാ വകുപ്പ് അറിയിച്ചു.
SUMMARY: Food safety violations at railway stations
