കണ്ണൂർ: വീടിന് മുകളിലെ വാട്ടർ ടാങ്ക് വൃത്തിയാക്കുന്നതിനിടെ താഴേക്ക് വീണ് ചികിത്സയിലായിരുന്ന ഗൃഹനാഥൻ അന്തരിച്ചു. ആലക്കോട് നടുവില് കുടിയാൻമല മുന്നൂർകൊച്ചി സ്വദേശി ഇരുപ്പക്കാട്ട് വീട്ടില് ബാബു ചെറിയാൻ (72) ആണ് മരിച്ചത്. പരിയാരത്തെ കണ്ണൂർ ഗവ. മെഡിക്കല് കോളജ് ആശുപത്രിയില് തീവ്രപരിചരണ വിഭാഗത്തില് കഴിയവെ വെള്ളിയാഴ്ച രാത്രി ഏഴുമണിയോടെയായിരുന്നു അന്ത്യം.
മേയ് 9-ന് വൈകീട്ട് 3.30-ഓടെയായിരുന്നു അപകടം സംഭവിച്ചത്. വീടിന്റെ രണ്ടാം നിലയ്ക്ക് മുകളിലെ ചിമ്മിനിയില് സ്ഥാപിച്ചിരുന്ന വാട്ടർ ടാങ്ക് വൃത്തിയാക്കുന്നതിനിടെ ബാബു ചെറിയാൻ കാല്വഴുതി രണ്ടാം നിലയിലെ ടെറസിലേക്ക് വീഴുകയായിരുന്നു. തലയ്ക്ക് ഗുരുതരമായി പരുക്കേറ്റ ഇദ്ദേഹത്തെ ഉടൻ തന്നെ മെഡിക്കല് കോളജ് ആശുപത്രിയില് എത്തിച്ചെങ്കിലും ഇന്നലെ രാത്രിയോടെ ആരോഗ്യനില വഷളാവുകയും മരണം സംഭവിക്കുകയുമായിരുന്നു.
SUMMARY: Homeowner dies after falling while cleaning water tank
