ജമ്മു: ജമ്മു കശ്മീരിലെ ഏക ആം ആദ്മി പാര്ട്ടി എംഎല്എ പൊതുസുരക്ഷാ നിയമപ്രകാരം അറസ്റ്റില്. എംഎല്എ മെഹ്രാജ് മാലിക്കിനെയാണ് അറസ്റ്റ് ചെയ്തത്. പൊതുസുരക്ഷാ നിയമ (പി എസ് എ) പ്രകാരമാണ് മാലികിന്റെ അറസ്റ്റ് രേഖപ്പെടുത്തിയത്. ദോഡയിലെ ഡെപ്യൂട്ടി കമ്മീഷണര് ഹര്വീന്ദര് സിംഗിനെതിരെ അധിക്ഷേപ പരാമര്ശങ്ങള് നടത്തുകയും ‘അണ് പാര്ലിമെന്ററി’ ഭാഷ ഉപയോഗിക്കുകയും ചെയ്തതിനാണ് നടപടി. പി എസ് എ പ്രകാരം ഒരു സിറ്റിംഗ് എംഎല്എയെ അറസ്റ്റ് ചെയ്യുന്നത് ഇതാദ്യമാണ്. രണ്ടുവര്ഷം വരെ കുറ്റം ചുമത്താതെയും വിചാരണ നടത്താതെയും ഒരാളെ തടങ്കലില് വെക്കാന് അനുവദിക്കുന്ന വകുപ്പാണിത്.
കഴിഞ്ഞ വര്ഷം നടന്ന തിരഞ്ഞെടുപ്പില് ജമ്മു കശ്മീരിലെ ദോഡ നിയോജക മണ്ഡലത്തില് ബിജെപിയുടെ ഗജയ് സിങ് റാണയെ 4538 വോട്ടിന് മാലിക് പരാജയപ്പെടുത്തിയാണ് മാലിക് നിയമസഭയിലെത്തിയത്. ആം ആദ്മി പാര്ട്ടിക്ക് ജമ്മുവില് ആദ്യ വിജയം നേടിക്കൊടുത്തതും മാലിക്കാണ്.
സര്ക്കാര് രൂപീകരണത്തില് ഒമര് അബ്ദുല്ലയ്ക്ക് പിന്തുണ നല്കിയ മാലിക് ഈ വര്ഷം ജൂണില് ഒമര് സര്ക്കാരിനുള്ള പിന്തുണ പിന്വലിച്ച് പ്രതിപക്ഷത്തേക്ക് മാറാനും തീരുമാനിച്ചിരുന്നു. മാലിക്കിനെതിരെ പിഎസ്എ ചുമത്തിയ നടപടിയെ പീപ്പിള്സ് കോണ്ഫറന്സ് പ്രസിഡന്റും എംഎല്എയുമായ ഹന്ദ്വാര സജാദ് ലോണ് അപലപിച്ചു.
SUMMARY: Jammu and Kashmir’s lone Aam Aadmi Party MLA Mehraj Malik arrested for disturbing law and order
