ബെംഗളൂരു: കർണാടക മന്ത്രിസഭാ വികസനം ഉടൻ നടന്നേക്കും. മുഖ്യമന്ത്രി ഡി.കെ. ശിവകുമാർ കോൺഗ്രസ് എം.എൽ.എമാരിൽ നിന്ന് ഏകദേശം 20 പേരുടെ ചുരുക്കപ്പട്ടിക തയ്യാറാക്കിയതായാണ് റിപ്പോർട്ട്. കോൺഗ്രസ് ഹൈക്കമാൻഡിന്റെ അന്തിമ അനുമതി ലഭിച്ചാൽ പുതിയ മന്ത്രിമാരുടെ സത്യപ്രതിജ്ഞ തിങ്കളാഴ്ച നടക്കാനാണ് സാധ്യത.
ജാതി, സമുദായ, വനിതാ പ്രാതിനിധ്യം എന്നിവ പരിഗണിച്ചാണ് പട്ടിക തയ്യാറാക്കിയതെന്നാണ് റിപ്പോർട്ടുകൾ. അന്തിമ തീരുമാനം കോൺഗ്രസ് അധ്യക്ഷൻ മല്ലികാർജുൻ ഖാർഗെയും ലോക്സഭ പ്രതിപക്ഷ നേതാവ് രാഹുൽ ഗാന്ധിയും ഉൾപ്പെടെയുള്ള ഹൈക്കമാൻഡ് നേതൃത്വത്തിന്റെ അനുമതിക്ക് ശേഷമായിരിക്കും.
പട്ടികയിൽ അജയ് ധരം സിങ്, യശ്വന്തരായഗൗഡ പട്ടീൽ, ശരത് ബച്ചേഗൗഡ, റിസ്വാൻ അർഷാദ്, എ.എസ്. പൊന്നണ്ണ, എസ്.എസ്. മല്ലികാർജുൻ, ലക്ഷ്മൺ സവദി, സന്തോഷ് ലാഡ്, കെ.എം. ശിവലിംഗേഗൗഡ, സമീർ അഹമ്മദ് ഖാൻ, ലക്ഷ്മി ഹെബ്ബാൾക്കർ അടക്കമുള്ള നേതാക്കളുടെ പേരുകളാണ് പ്രധാനമായും പരിഗണനയിലുള്ളത്. എന്നാൽ അവസാന നിമിഷ ചർച്ചകൾക്കനുസരിച്ച് പട്ടികയിൽ മാറ്റം വരാനിടയുണ്ടെന്നും റിപ്പോർട്ടുകൾ പറയുന്നു.
മന്ത്രിസഭാ വികസനത്തിലൂടെ പ്രാദേശിക-സാമുദായിക സമവാക്യം ഉറപ്പാക്കാനും, ഭരണനിർവഹണം കൂടുതൽ ശക്തമാക്കാനുമാണ് കോൺഗ്രസ് നേതൃത്വം ലക്ഷ്യമിടുന്നത്. അതേസമയം, മന്ത്രിസ്ഥാനത്തിനായി നിരവധി മുതിർന്ന നേതാക്കൾ രംഗത്തുള്ളതിനാൽ അവസാനഘട്ട ചർച്ചകൾ നിർണായകമാകുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ. ഔദ്യോഗിക പ്രഖ്യാപനം ഹൈക്കമാൻഡിന്റെ അന്തിമ അനുമതിക്ക് ശേഷമായിരിക്കും.
SUMMARY: Karnataka cabinet expansion imminent; Reports suggest shortlist of 20 MLAs has been prepared
