കോതമംഗലം: എറണാകുളം കോട്ടപ്പടിയില് കാട്ടാനയുടെ ആക്രമണം. ഇന്ന് രാവിലെ ഉണ്ടായ ആക്രമണത്തില് രണ്ടുപേർക്ക് പരുക്കേറ്റു. കോതമംഗലം കുളങ്ങാട്ടുകുഴി സ്വദേശികളായ ഗോപി, അയ്യപ്പൻകുട്ടി എന്നിവർക്കാണ് പരുക്കേറ്റത്. രാവിലെ 7 മണിയോടെ കോട്ടപ്പടിക്കടുത്തുള്ള വാവേലിയില് ബൈക്കില് സഞ്ചരിക്കുമ്പോഴാണ് ഇരുവരും അബദ്ധത്തില് കാട്ടാനയുടെ മുന്നില്പ്പെട്ടത്.
കാട്ടാന തുമ്പിക്കൈ കൊണ്ട് ആക്രമിച്ചെങ്കിലും, ഇരുവരും വാഹനം ഉപേക്ഷിച്ച് ഓടി രക്ഷപ്പെടുകയായിരുന്നു. പരുക്കേറ്റ ഇവരെ ഉടൻതന്നെ നാട്ടുകാർ സമീപത്തെ സർക്കാർ ആശുപത്രിയില് പ്രവേശിപ്പിച്ചു. ഇരുവരുടെയും പരുക്ക് നിസ്സാരമാണെന്നും നില തൃപ്തികരമാണെന്നും പോലീസ് അറിയിച്ചു.
അതേസമയം, വനം ഉദ്യോഗസ്ഥർ ഉടൻ സ്ഥലത്തെത്തി ആനയെ വനത്തിലേക്ക് തുരത്താനുള്ള നടപടികള് സ്വീകരിച്ചു. മേഖലയില് കാട്ടാന ഭീഷണി നിലനില്ക്കുന്നതിനാല് നാട്ടുകാർക്ക് ജാഗ്രതാ നിർദ്ദേശം നല്കിയിട്ടുണ്ട്.
SUMMARY: Wild elephant attack; two injured
