കൊച്ചി: കേരളത്തില്‍ എല്‍ഡിഎഫ് വീണ്ടും വരണമെന്നാണ് ആഗ്രഹമെന്ന് വെള്ളാപ്പള്ളി നടേശന്‍. അതിന് തന്‍റേതായ ന്യായമുണ്ടെന്നും എല്‍ഡിഎഫ് ഒരുപാട് കാര്യങ്ങള്‍ ചെയ്തെന്നും വെള്ളാപ്പള്ളി നടേശൻ മാധ്യമങ്ങളോട് പറഞ്ഞു. അവർ നേരിയ ഭൂരിപക്ഷത്തില്‍ ജയിക്കും. യുഡിഎഫ് ഭരണത്തില്‍ വന്നാല്‍ കലഹം ഉറപ്പാണെന്നും ഭരണം കിട്ടുമെന്ന് തോന്നിയപ്പോള്‍ ഇതാണ് അവസ്ഥയെന്നും വെള്ളാപ്പള്ളി മാധ്യമങ്ങളോട് പറഞ്ഞു.
സംസ്ഥാനത്ത് ബിജെപി അക്കൗണ്ട് തുറക്കുമെന്ന് വെള്ളാപ്പള്ളി നടേശൻ പറഞ്ഞു. ഇന്ത്യ ഭരിക്കുന്ന പാർട്ടിയാണ് ബിജെപി. അവർ അക്കൗണ്ട് തുറന്നാല്‍ പ്രശ്നമില്ല. തിരുത്തല്‍ ശക്തിയായി ഉണ്ടാകും. തിരുവനന്തപുരം ജില്ലയിലാവും ജയമെന്ന് അദ്ദേഹം കൂട്ടിച്ചേർത്തു. തുടർച്ചയായ 10 വർഷത്തെ ഭരണം എല്‍ഡിഎഫ് താഴെ തട്ടിലെ അണികളെ ആലസ്യത്തിലാക്കി. താഴെ തട്ടില്‍ പ്രവർത്തനം ശക്തമല്ല. എല്‍ഡിഎഫ് വന്നാല്‍ മുഖ്യമന്ത്രി പിണറായി തന്നെയാകുമെന്ന് വെള്ളാപ്പള്ളി നടേശൻ പറഞ്ഞു.
വി ഡി സതീശൻ മുഖ്യമന്ത്രി ആകുമെന്നാണ് ലീഗിന്‍റെ വാദം. കോണ്‍ഗ്രസില്‍ ഹൈക്കമാൻഡ് ഇല്ലേ എന്ന് ചോദിച്ച വെള്ളാപ്പള്ളി, ലീഗ് കോണ്‍ഗ്രസിന്റെ ഹൈക്കമാൻഡ് ആകുന്നുവെന്നും വിമര്‍ശിച്ചു. യുഡിഎഫ് അധികാരത്തില്‍ വന്നാല്‍ മുഖ്യമന്ത്രി ആരെന്ന് ഹൈക്കമാൻഡ് തീരുമാനിക്കട്ടെയെന്നും അദ്ദേഹം പറഞ്ഞു. വി ഡി സതീശൻ വനവാസത്തിന് പോകരുത്. വി ഡി സതീശനുമായി വഴക്ക് ഇല്ല. സതീശൻ കൊള്ളാവുന്ന രാഷ്ട്രീയനേതാവാണെന്ന് വെള്ളാപ്പള്ളി കൂട്ടിച്ചേർത്തു.
SUMMARY: LDF should come back; Vellappally says conflict is certain if UDF comes to power
