തിരുവനന്തപുരം: എൽ.പി.എസ്.ടി (LPST) റാങ്ക് ഹോൾഡേഴ്സ് സമരസമിതി കൺവീനർ എസ്. വളർമതിയുടെ ആരോഗ്യനില വഷളായതിനെ തുടർന്ന് ആശുപത്രിയിൽ പ്രവേശിപ്പിച്ചു. നിരാഹാര സമരം തുടരുന്നതിനിടയിൽ ആരോഗ്യനില മോശമായതിനെത്തുടർന്ന് അവരെ തിരുവനന്തപുരം ജനറൽ ആശുപത്രിയിലെ തീവ്രപരിചരണ വിഭാഗത്തിൽ (ഐ.സി.യു) പ്രവേശിപ്പിക്കുകയായിരുന്നു.
സർക്കാർ ചർച്ചകളിൽ തങ്ങളുടെ ആവശ്യങ്ങൾ അംഗീകരിക്കാത്തതിനെത്തുടർന്ന് ഉദ്യോഗാർത്ഥികൾ സെക്രട്ടേറിയറ്റിന് മുന്നിൽ നടത്തിവരുന്ന സമരം കൂടുതൽ ശക്തമാക്കിയിരിക്കുകയാണ്.
എൽപിഎസ്ടി സമരം 132 ദിവസം പിന്നിട്ടു. റാങ്ക് ഹോൾഡർമാരായ ജയകൃഷ്ണന്റെയും സിജെയുടെയും നിരാഹാര സമരവും മൂന്നാം ദിവസത്തിലേക്ക് കടന്നു. ആരോഗ്യനില മോശമായതിനെ തുടർന്ന് ഇവരെയും ആശുപത്രിയിലേക്ക് മാറ്റിയിരുന്നു. എന്നാൽ സമരത്തിൽ നിന്ന് പിന്മാറാൻ വളർമതി തയ്യാറായിട്ടില്ല.
വിദ്യാർഥി-അധ്യാപക അനുപാതം കുറയ്ക്കുന്നത് പ്രായോഗികമല്ലെന്ന നിലപാടിൽ സർക്കാർ ഉറച്ചുനിൽക്കുകയാണ്.
സമരപ്പന്തൽ പൊളിച്ചുനീക്കിയതിന് പിന്നാലെ ഉദ്യോഗാർഥികൾക്ക് രാഷ്ട്രീയ പിന്തുണയേറുകയാണ്. വിവിധ രാഷ്ട്രീയ പാർട്ടികളും യുവജന സംഘടനകളും സമരത്തിന് ഐക്യദാർഢ്യവുമായി രംഗത്തെത്തി. അധ്യാപക നിയമനവുമായി ബന്ധപ്പെട്ട പ്രശ്നങ്ങൾക്ക് പരിഹാരം കാണണമെന്നും ആവശ്യങ്ങൾ അംഗീകരിക്കുന്നതുവരെ സമരം തുടരുമെന്നും റാങ്ക് ഹോൾഡർമാർ വ്യക്തമാക്കുന്നു.
