ബെംഗളൂരു: ചിക്കമഗളൂരുവില്‍ കുടുംബത്തോടൊപ്പമുള്ള യാത്രയ്ക്കിടെ കാണാതായ പാലക്കാട് സ്വദേശിനി ശ്രീനന്ദയുടെ മൃതദേഹം കണ്ടെത്തി. കാണാതായി നാലാം ദിവസത്തിലാണ് മൃതദേഹം കണ്ടെത്തിയത്. മാണിക്യധാര വ്യൂ പോയിന്റിന് താഴെ ഭാഗത്തെ താഴ്വാരത്താണ് മൃതദേഹം കണ്ടെത്തിയത്. മൃതദേഹം പുറത്തേക്ക് എത്തിച്ചു.
പാലക്കാട് കടമ്പഴിപുറത്തെ രമേശിന്റെ മകള്‍ ശ്രീനന്ദ(15)യെയാണ് ചൊവ്വാഴ്ച വൈകീട്ടോടെ കാണാതായത്. 40-ഓളം കുടുംബാംഗങ്ങളുടെ സംഘത്തിനൊപ്പം ചിക്കമഗളൂരുവില്‍ വിനോദയാത്രയക്ക് എത്തിയതായിരുന്നു. ബാബാബുഡാന്‍ ഗിരികുന്നിലെ മാണിക്കധാര വെള്ളച്ചാട്ടം കാണാനെത്തിയപ്പോഴാണ് ശ്രീനന്ദയെ കാണാതായത്. മകളെ ആരെങ്കിലും തട്ടിക്കൊണ്ടുപോയതാകാമെന്ന് രക്ഷിതാക്കളും ബന്ധുക്കളും പരാതിപ്പെട്ടിരുന്നു.
മാണിക്കധാര വെള്ളച്ചാട്ടം, ബാബാ ബുധന്‍ഗിരി കുന്ന് എന്നിവിടങ്ങള്‍ കേന്ദ്രീകരിച്ചായിരുന്നു ആദ്യ ദിവസങ്ങളില്‍ പരിശോധന നടത്തിയത്. കുന്നിന്റെ 300 അടി താഴ്ചയില്‍വരെ തെര്‍മല്‍ ഡ്രോണുകള്‍ ഉപയോഗിച്ച് അടക്കം പരിശോധന നടത്തിയെങ്കിലും നിരാശയായിരുന്നു ഫലം.
വെള്ളിയാഴ്ച രാവിലെ മുതല്‍ പ്രദേശത്ത് ശക്തമായ തിരച്ചില്‍ നടത്തി വരുന്നതിനിടെയാണ് കാണാതായ സ്ഥലത്ത് നിന്ന് 1500 അടി താഴ്ചയില്‍നിന്ന് മൃതദേഹം കണ്ടെത്തിയത്. വനം വകുപ്പും പോലീസും നാട്ടുകാരുമടങ്ങുന്ന നൂറോളം പേരുടെസംയുക്ത പരിശോധനയിലാണ് മൃതദേഹം കണ്ടെത്തിയത്. കേരള പോലീസ് സംഘവും ഇവിടെ തിരച്ചിലിനായി എത്തിയിരുന്നു.
SUMMARY: Missing Sreenanda found dead, body found 1500 feet below ground
