ബെംഗളൂരു: 2026-ലെ ബുക് ബ്രഹ്മ സാഹിത്യപുരസ്കാരത്തിന് തെലുങ്ക് സാഹിത്യകാരന് മുഹമ്മദ് ഖദീർ ബാബു അര്ഹനായി. തെലുങ്ക് സാഹിത്യത്തിന് നൽകിയ മികച്ച സംഭാവനകൾ പരിഗണിച്ചാണ് പുരസ്കാരം. ഓഗസ്റ്റ് 14 മുതല് 23 വരെ ബെംഗളൂരു സെന്റ് ജോണ്സ് ഓഡിറ്റോറിയത്തില് നടക്കുന്ന ബുക് ബ്രഹ്മ സാഹിത്യോത്സവത്തിന്റെ സമാപനദിവസം പുരസ്കാരം സമ്മാനിക്കും. സമകാലിക തെലുങ്ക് സാഹിത്യത്തിലെ ശ്രദ്ധേയനായ എഴുത്തുകാരനാണ് മുഹമ്മദ് ഖദീർ ബാബു. ചെറുകഥാകൃത്ത്, നോവലിസ്റ്റ്, പത്രപ്രവർത്തകൻ, തിരക്കഥാകൃത്ത് എന്നീ നിലകളിൽ പ്രശസ്തനാണ്.
മലയാളം, തമിഴ്, തെലുങ്ക്, കന്നഡ എന്നീ ദക്ഷിണേന്ത്യൻ ഭാഷകളിലെ എഴുത്തുകാരുടെ മികച്ച സാഹിത്യ സംഭാവനകൾക്ക് നൽകിവരുന്ന അംഗീകാരമാണ് ബെംഗളൂരു ആസ്ഥാനമായുള്ള ബുക്ക് ബ്രഹ്മ ഫൗണ്ടേഷൻ ഏർപ്പെടുത്തിയ ബുക്ക് ബ്രഹ്മ സാഹിത്യ പുരസ്കാരം. രണ്ട് ലക്ഷം രൂപയും ഫലകവും അടങ്ങുന്നതാണ് പുരസ്കാരം. പ്രഥമ പുരസ്കാരം തമിഴ്-മലയാളം എഴുത്തുകാരനായ ബി. ജയമോഹന് ആയിരുന്നു ലഭിച്ചത്. 2025-ലെ പുരസ്കാരം മലയാളത്തിലെ പ്രശസ്ത എഴുത്തുകാരി കെ.ആർ. മീരയ്ക്കായിരുന്നു.
SUMMARY: Telugu writer Mohammed Qadeer Babu wins 2026 Book Brahma Literary Award
