ബെംഗളൂരു: ബിജെപി നേതാവ് യോഗേഷ് ഗൗഡയെ കൊലപ്പെടുത്തിയ കേസിൽ ജീവപര്യന്തം തടവിനു ശിക്ഷിക്കപ്പെട്ട കോൺഗ്രസ് എംഎൽഎ വിനയ് കുൽക്കർണിയെ നിയമസഭാ സെക്രട്ടേറിയറ്റ് 6 വർഷത്തേക്ക് അയോഗ്യനാക്കി. ധാർവാഡിലെ ബി.ജെ.പി. ജില്ലാ പഞ്ചായത്തംഗമായിരുന്ന യോഗേഷ് ഗൗഡയെ കൊലപ്പെടുത്തിയ കേസിലാണ് കുൽക്കർണിയെ ബെംഗളൂരുവിലെ ജനപ്രതിനിധികളുടെ കോടതി ശിക്ഷിച്ചത്.
ഇതോടെ എം.എൽ.എ. സ്ഥാനത്തുനിന്ന് അയോഗ്യനാക്കി കർണാടക നിയമസഭ വിജ്ഞാപനമിറക്കി. 2016 ജൂൺ 15 നാണ് യോഗേഷിനെ സപ്താപുരയിലെ ജിമ്മിൽ കൊല്ലപ്പെട്ട നിലയിൽ കണ്ടെത്തിയത്. കേസിൽ വിനയ് ഉൾപ്പെടെ 16 പേർക്കാണ് കഴിഞ്ഞ 17 ന് കോടതി ജീവപര്യന്തം തടവ് ശിക്ഷ വിധിച്ചത്.
ധാർവാഡ് മണ്ഡലമായിരുന്നു കുൽക്കർണി പ്രതിനിധാനം ചെയ്യുന്നത്. മേൽക്കോടതികളിൽനിന്ന് ശിക്ഷക്ക് സ്റ്റേ വാങ്ങാനായില്ലെങ്കിൽ മണ്ഡലത്തിൽ ഉപതിരഞ്ഞെടുപ്പിന് കളമൊരുങ്ങും. ശിക്ഷ കഴിഞ്ഞ് പുറത്തിറങ്ങി ആറു വർഷത്തേക്കുകൂടി കുൽക്കർണിക്ക് നിയമസഭാഗമാകാനുള്ള അയോഗ്യത തുടരും. അതേസമയം 224 അംഗ നിയമസഭയിൽ നിന്ന് വിനയ് കുൽക്കർണി അയോഗ്യനായെങ്കിലും വ്യക്തമായ ഭൂരിപക്ഷമുള്ളതിനാൽ കോൺഗ്രസ് സർക്കാരിന് ഭീഷണിയില്ല.
SUMMARY: Murder case: Vinay Kulkarni disqualified for 6 years
