മലപ്പുറം: കുറ്റിപ്പുറം ബസ് അപകടത്തിന് കാരണം അമിതവേഗമെന്ന് മോട്ടോര് വാഹന വകുപ്പിന്റെ അന്വേഷണ റിപ്പോര്ട്ട്. എംവിഡി ഗതാഗത കമ്മീഷണര്ക്ക് റിപ്പോര്ട്ട് സമര്പ്പിച്ചു. അപകടസ്ഥലത്തിന് സമീപം രണ്ട് വളവുകളുണ്ട്. അമിത വേഗത്തില് എത്തിയ ബസ് ആദ്യ വളവ് പിന്നിട്ടു. എന്നാല് രണ്ടാമത്തെ വളവില് വെച്ച് നിയന്ത്രണം നഷ്ടപ്പെട്ടതായി റിപ്പോര്ട്ടില് പറയുന്നു.
വളവുകളില് അനുവദിച്ചിട്ടുള്ള പരമാവധി വേഗപരിധി മണിക്കൂറില് 50 കിലോമീറ്ററാണ്. എന്നാല് അപകടത്തില്പ്പെട്ട ബസ് അതിന്റെ ഇരട്ടിയിലധികം വേഗത്തിലായിരുന്നു സഞ്ചരിച്ചിരുന്നത്. കൂടാതെ, മഴയുണ്ടായിരുന്നതിനാല് റോഡില് ജലപാളികള് രൂപപ്പെട്ടിരുന്നു. അമിതവേഗത്തിലെത്തിയ ബസ് ഈ ജലപാളികളിലൂടെ സഞ്ചരിച്ചപ്പോള് ഹൈഡ്രോ പ്ലെയിനിങ് എന്ന പ്രതിഭാസം ഉണ്ടായി. ഇതോടെ ടയറും റോഡും തമ്മിലുള്ള ഘര്ഷണം ഇല്ലാതാവുകയും നിയന്ത്രണം നഷ്ടപ്പെട്ട ബസ് ഡിവൈഡറിലേക്ക് ഇടിച്ചുകയറുകയുമായിരുന്നു എന്നാണ് റിപോര്ട്ടിലുള്ളത്.
ബസിന്റെ അമിതവേഗമാണ് അപകടകാരണമെന്ന് അന്നുതന്നെ ദൃക്സാക്ഷികളുടെ മൊഴിയുണ്ടായിരുന്നു. മോട്ടോര് വാഹന വകുപ്പിന്റെയും പോലിസിന്റെയും പ്രാഥമിക നിഗമനവും ഇതുതന്നെയായിരുന്നു. ജൂലൈ 26നായിരുന്നു കുറ്റിപ്പുറം റെയില്വേ മേല്പ്പാലത്തിനു സമീപം ആറുവരിപ്പാതയില് അപകടമുണ്ടായത്. തൃശൂര്-കോഴിക്കോട് റൂട്ടിലോടുന്ന സ്വകാര്യബസാണ് അപകടത്തില്പ്പെട്ടിരുന്നത്.
ഡിവൈഡറില് ഇടിച്ച ബസ് തലകീഴായി മറിയുകയായിരുന്നു. അപകടത്തില് ഒരാള് മരിക്കുകയും നിരവധി പേര്ക്ക് പരുക്കേല്ക്കുകയും ചെയ്തു. കോഴിക്കോട് പെരുവയല് സ്വദേശി വൈഷ്ണവാണ് അപകടത്തില് മരിച്ചത്. 38 പേര്ക്ക് പരുക്കേല്ക്കുകയും ചെയ്തിരുന്നു. അപകടത്തില് ബസ് പൂര്ണ്ണമായും തകര്ന്നു. അപകടത്തില് ഡ്രൈവര്ക്കെതിരേ കുറ്റിപ്പുറം പോലിസ് കേസെടുത്തിരുന്നു.
SUMMARY: MVD report attributes Kuttippuram bus accident to driver negligence
