ബെംഗളൂരു: ഔട്ടർ റിംഗ് റോഡിലൂടെയുള്ള നമ്മ മെട്രോയുടെ ബ്ലൂ ലൈൻ ഇടനാഴിയില് 2026 ഒക്ടോബറിൽ പരീക്ഷണയോട്ടം ആരംഭിക്കുമെന്ന് ബെംഗളൂരു വികസന മന്ത്രി കൃഷ്ണ ബൈരെ ഗൗഡ. ബാംഗ്ലൂർ മെട്രോ റെയിൽ കോർപ്പറേഷൻ ലിമിറ്റഡ് (ബിഎംആർസിഎൽ) ഉദ്യോഗസ്ഥരുമായുള്ള അവലോകന യോഗത്തിന് ശേഷം ബ്ലൂ ലൈനിലെ കെആർ പുരയ്ക്കും മാറത്തഹള്ളിക്കും ഇടയിൽ പരീക്ഷണ ഓട്ടം ആരംഭിക്കാനുള്ള ശ്രമങ്ങൾ നടന്നുവരികയാണെന്നും മന്ത്രി പറഞ്ഞു.
നിലവില് തീരുമാനിച്ചിരിക്കുന്നതുപോലെ നിര്മാണ പ്രവര്ത്തനങ്ങള് നടന്നാല്, പരീക്ഷണയോട്ടം എച്ച്എസ്ആര് ലേഔട്ട് വരെ നീട്ടാനും സാധ്യതയുണ്ടെന്നും മന്ത്രി പറഞ്ഞു. മാറത്തഹള്ളി, സില്ക്ക് ബോര്ഡ് എന്നിവ ഉള്പ്പെടെയുള്ള പ്രധാന സ്റ്റേഷനുകളില് ഇപ്പോഴും നിര്മാണ ജോലികള് പുരോഗമിക്കുകയാണ്. ഇവ വളരെ വേഗത്തില് പൂര്ത്തിയാക്കാന് സര്ക്കാര് ഉദ്യോഗസ്ഥര്ക്ക് നിര്ദേശം നല്കിയിട്ടുണ്ട്. അദ്ദേഹം പറഞ്ഞു.
സിൽക്ക് ബോർഡ് മുതൽ കെംപെഗൗഡ രാജ്യാന്തര വിമാനത്താവളം വരെയുള്ള പാതയ്ക്ക് 55 കിലോമീറ്റർ ദൈർഘ്യമുണ്ട്. ഇതിൽ സിൽക്ക് ബോർഡ് മുതൽ കെ.ആർ. പുരം വരെയുള്ള 19 കിലോമീറ്റർ ഭാഗമാണ് ആദ്യം പൂർത്തിയാക്കുന്നത്. പരീക്ഷണയോട്ടം പൂര്ത്തിയാക്കിയാല് ഡിസംബർ അവസാനത്തോടെ പാത ഗതാഗതത്തിനായി തുറന്നുകൊടുക്കാനാണ് സാധ്യത.
സെൻട്രൽ സിൽക്ക് ബോർഡ്, എച്ച്എസ്ആർ ലേഔട്ട്, അഗസര ഹള്ളി, ബെല്ലന്തൂർ, ഇബ്ബലൂർ, കടുബീസനഹള്ളി, മാറത്തഹള്ളി, ഐഎസ്ആർഒ, ദൊഡ്ഡനെക്കുണ്ടി, കെആർ പുര എന്നിങ്ങനെ 13 സ്റ്റേഷനുകളാണ് ആദ്യ സ്ട്രെച്ചില് ഉള്ളത്. നഗരത്തിലെ ഐ.ടി. കേന്ദ്രങ്ങളിലൂടെ കടന്നുപോകുന്ന പാത നഗരത്തിലെ ഗതാഗതത്തിരക്ക് കുറയ്ക്കുന്നതിന് നിർണായകപങ്ക് വഹിക്കുമെന്നാണ് കണക്കുകൂട്ടുന്നത്.
SUMMARY: Namma Metro Blue Line; Test run in October
