മുംബൈ: യു.പി.ഐയില് ഒരു രൂപയുടെ ഇടപാട് നടത്തിയാല് പോലും മൊബൈല് ഫോണില് എസ്.എം.എസ് വരുന്ന കാലമാണിത്. എന്നാല്, ഇനി ചെറിയ പണമിടപാടുകള്ക്ക് എസ്.എം.എസ് അയക്കുന്നത് നിര്ത്താനുള്ള പദ്ധതിയിലാണ് ബാങ്കുകള്. അതായത് 100 രൂപയില് കുറഞ്ഞ തുകയുടെ ഇടപാട് നടത്തിയാല് എസ്.എം.എസ് അയക്കുന്നത് ഒഴിവാക്കാന് അനുവദിക്കണമെന്ന് ബാങ്കുകള് റിസര്വ് ബാങ്കിനോട് ആവശ്യപ്പെട്ടു.
യു.പി.ഐ ഇടപാട് ഓരോ ദിവസവും വര്ധിച്ചുകൊണ്ടിരിക്കുന്ന സാഹചര്യത്തിലാണ് നീക്കം. ഒരു രൂപയുടെ ഇടപാടിന് പോലും നോട്ടിഫിക്കേഷന് വരുന്നത് കാരണം വന്തുകയുടെ ഇടപാടിനുള്ള എസ്.എം.എസ് അലര്ട്ട് ഉപഭോക്താക്കള് അറിയാതെ പോകുകയാണെന്നാണ് ബാങ്കുകള് പറയുന്നത്. പൊതുമേഖല, സ്വകാര്യ ബാങ്കുകളുടെ പ്രതിനിധികള് കഴിഞ്ഞ മാസം നടത്തിയ ചര്ച്ചക്ക് ശേഷമാണ് സംയുക്ത തീരുമാനമെടുത്തത്. തുടര്ന്ന്, സാമ്പത്തിക തട്ടിപ്പുകള് തടയാനുള്ള ചില മാര്ഗനിര്ദേശങ്ങള് അടക്കം ഉള്പ്പെടുത്തി ഒരു പട്ടിക ആര്.ബി.ഐക്ക് സമര്പ്പിച്ചു. ഇനി ഇക്കാര്യത്തില് ആര്.ബി.ഐയാണ് അന്തിമ തീരുമാനമെടുക്കേണ്ടത്. അതേസമയം, എസ്.എം.എസ് നിര്ത്തലാക്കുന്നതിന് മുമ്പ് ബാങ്കുകള് ഉപഭോക്താക്കളുടെ അനുമതി തേടുമെന്ന് ബാങ്ക് വൃത്തങ്ങള് അറിയിച്ചു.
നിലവില് ആര്.ബി.ഐ നിയമപ്രകാരം പണമിടപാട് നടത്തിയാല് ഉപഭോക്താവിന് എസ്.എം.എസ് അലര്ട്ട് അയക്കണം. എന്നാല്, എസ്.എം.എസ് അലര്ട്ട് ഒഴിവാക്കാന് ഉപഭോക്താവിന് സൗകര്യമുണ്ട്. ഒരു എസ്.എം.എസ് അയക്കാന് 20 പൈസയാണ് ബാങ്കിന് ചെലവ്. ഈ ചെലവ് ഉപഭോക്താവില്നിന്ന് ഈടാക്കുകയാണ് ചെയ്യുന്നത്. അതേസമയം, ഇ -മെയില് അലര്ട്ടുകള് സൗജന്യമാണ്. സെപ്റ്റംബറിലെ കണക്ക് പ്രകാരം 1,963.34 കോടി യു.പി.ഐ ഇടപാടാണ് രാജ്യത്ത് നടന്നത്.
SUMMARY: No more SMS for small money transactions
WhatsApp
Telegram
