ബെംഗളൂരു: സംസ്ഥാന സർക്കാർ സ്ഥാപനമായ നോർക്ക റൂട്ട്സ് ലോകത്തെമ്പാടുമുള്ള പ്രവാസി കേരളീയർക്കായി ഏർപ്പെടുത്തിയ വിവിധ ഐഡി കാർഡുകളുടെ സേവനങ്ങൾ സംബന്ധിച്ച് ഇന്നുമുതൽ ജൂലൈ 15 വരെ പ്രചാരണ മാസാചരണം നടത്തും. വിദേശത്ത് 6 മാസത്തിൽ കൂടുതൽ ജോലി ചെയ്യുകയോ താമസിക്കുകയോ ചെയ്യുന്ന കേരളീയർക്കുള്ള പ്രവാസി ഐഡി കാർഡ്, വിദേശരാജ്യങ്ങളിൽ പഠിക്കുന്ന കേരളീയ വിദ്യാർഥികൾക്കുള്ള സ്റ്റുഡന്റ് ഐഡി കാർഡ്, കേരളത്തിനു പുറത്ത് ഇന്ത്യയിലെ മറ്റു സംസ്ഥാനങ്ങളിലുള്ള പ്രവാസി കേരളീയർക്കായുള്ള എൻആർകെ ഐഡി കാർഡ്, ഗുരുതര രോഗങ്ങൾക്കുള്ള ആരോഗ്യ ഇൻഷുറൻസ് പദ്ധതിയായ നോർക്ക പ്രവാസി രക്ഷ ഇൻഷുറൻസ് എന്നിവ സംബന്ധിച്ച് അവബോധം സൃഷ്ടിക്കാനാണു മാസാചരണം.
സംശയങ്ങൾ ദൂരീകരിക്കാനും പുതുക്കാൻ വൈകിയവർക്ക് പുതുക്കുന്നതിനും അവസരമുണ്ട്. 408 രൂപയുടെ ഒറ്റത്തവണ പ്രീമിയത്തിലൂടെ അപകടമരണത്തിന് 5 ലക്ഷം രൂപയുടെയും അംഗവൈകല്യങ്ങൾക്ക് 2 ലക്ഷം രൂപ വരെയും ഇൻഷുറൻസ് പരിരക്ഷയുണ്ട്. പ്രവാസിരക്ഷ ഇൻഷുറൻസ് പദ്ധതിയിൽ 661 രൂപയുടെ ഒറ്റത്തവണ പ്രീമിയത്തിലൂടെ ഗുരുതര രോഗങ്ങൾക്ക് ഒരുലക്ഷം രൂപ വരെയും അപകടമരണത്തിന് 3 ലക്ഷം രൂപയുടെയും അംഗവൈകല്യങ്ങൾക്ക് ഒരു ലക്ഷം രൂപ വരെയും പരിരക്ഷ ലഭിക്കും.
നോർക്ക ഐഡി കാർഡുകൾക്ക് 3 വർഷവും നോർക്ക പ്രവാസി രക്ഷ ഇൻഷുറൻസിന് ഒരു വർഷവുമാണു കാലാവധി. www.norkaroots.kerala.gov.in സന്ദർശിച്ച് സേവനം പ്രയോജനപ്പെടുത്താം. ഐഡി കാർഡ് ഉള്ളവർക്കു മാത്രമേ നോർക്ക കെയറിലും നോർക്ക കെയർ പ്ലസിലും അംഗമാകാനാകൂ. ഫോൺ:1800 425 3939(ഇന്ത്യയിൽനിന്ന്), +91-8802012345(വിദേശത്തുനിന്ന്) മിസ്ഡ് കോൾ സർവീസിലൂടെ ബന്ധപ്പെടാം.
SUMMARY: NORKA’s expatriate identity card: Special promotional campaign starts today
