മലപ്പുറം: നിലമ്പൂര്-ഷൊര്ണൂര് റെയില്പാതയില് തുവ്വൂരില് മേല്പ്പാലത്തിന്റെ സംരക്ഷണ ഭിത്തി ട്രാക്കിലേക്ക് ഇടിഞ്ഞുവീണു. ഇന്ന് പുലര്ച്ചെ മുന്നരയോടെ നിലമ്പൂര്-ഷൊര്ണൂര് വഴിയുള്ള മെമു ട്രെയിന് ഓടിക്കൊണ്ടിരിക്കെയാണ് സംഭവം. തുവ്വൂര് കമാനം മേല്പ്പാലത്തിന്റെ സംരക്ഷണ ഭിത്തിയാണ് ഇടിഞ്ഞത്. പാത നവീകരണത്തിന്റെ ഭാഗമായി മാസങ്ങള്ക്ക് മുമ്പ് നിര്മ്മിച്ച ഭിത്തിയില് നേരത്തേ വിള്ളല് കണ്ടെത്തിയിരുന്നുവെന്ന് നാട്ടുകാര് പറയുന്നു.
നിര്മ്മാണത്തിലെ അശാസ്ത്രീയതയും കഴിഞ്ഞ ദിവസങ്ങളിലുണ്ടായ വേനല്മഴയും ചേര്ന്നതാകാം ഇടിച്ചിലിന് കാരണമെന്ന് സംശയിക്കുന്നു. സ്റ്റേഷനില് നിന്ന് എടുത്ത ട്രെയിനായതിനാല് വേഗം കുറഞ്ഞിരുന്നത് വലിയ അപകടം ഒഴിവാക്കാന് സഹായിച്ചു. അഗ്നിശമനസേന, റെയില്വേ ഉദ്യോഗസ്ഥര്, നാട്ടുകാര് എന്നിവര് ചേര്ന്ന് ട്രാക്കില് വീണ മണ്ണും അവശിഷ്ടങ്ങളും നീക്കം ചെയ്തതോടെ ഗതാഗതം പുനസ്ഥാപിച്ചു.
ഏകദേശം ഒന്നര മണിക്കൂര് തടസ്സപ്പെട്ട മെമു ട്രെയിന് പിന്നീട് നിലമ്പൂരിലേക്ക് മടങ്ങി. മറ്റു സര്വീസുകളും വൈകിയതോടെ യാത്രക്കാര്ക്ക് അത് വലിയ ബുദ്ധിമുട്ടുണ്ടാക്കി. രാവിലെ 5.15ന് തുവ്വൂരിലെത്തേണ്ട രാജ്യറാണി എക്സ്പ്രസ് 7.45നാണ് പോയത്.
SUMMARY: Overpass wall collapses on track in Thuvvur; MEMU train disrupted
