ഡല്‍ഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരായ ഹർജിയില്‍ വിശദീകരണം തേടി സുപ്രിംകോടതി തിരഞ്ഞെടുപ്പ് കമ്മീഷന് നോട്ടീസയച്ചു. പത്രവാർത്തയുടെ അടിസ്ഥാനത്തില്‍ ഉത്തരവുകള്‍ പുറപ്പെടുവിക്കാൻ കഴിയില്ലെന്നും ഹരജിയില്‍ കേസ് തുടരുന്നതിന് മുൻപായി തിരഞ്ഞെടുപ്പ് കമ്മീഷന്റെ പ്രതികരണം ആവശ്യമാണെന്നും സുപ്രിംകോടതി വ്യക്തമാക്കി. അതേസമയം ഗ്യാനേഷിനെ സസ്പെൻഡ് ചെയ്യണമെന്ന ആവശ്യം കോടതി അംഗീകരിച്ചില്ല.
ഗ്യാനേഷ് കുമാറിനെ സസ്പെൻഡ് ചെയ്യണമെന്നും മറ്റു രണ്ട് തിരഞ്ഞെടുപ്പ് കമ്മീഷണർമാരുടെ സമ്മതമില്ലാതെ അദ്ദേഹം ഏകപക്ഷീയമായി തീരുമാനങ്ങള്‍ കൈക്കൊണ്ടെന്നും ആരോപിച്ച്‌ സമർപ്പിച്ച ഹർജിയിലാണ് സുപ്രിംകോടതിയുടെ നടപടി. വോട്ടർപട്ടികയില്‍ പേര് ചേർക്കുന്നതിനുള്ള ഫോം 6-ല്‍ മാറ്റം വരുത്താൻ കമ്മീഷന് അനുമതി നല്‍കിയിരുന്നെന്ന ഗ്യാനേഷിന്റെ വാദം തള്ളിയ കോടതി, അത്തരം അനുമതികളൊന്നും നല്‍കിയിരുന്നില്ലെന്ന് ചീഫ് ജസ്റ്റിസ് വ്യക്തമാക്കി.
വോട്ടർപട്ടികയുമായി ബന്ധപ്പെട്ട പ്രധാന രേഖകളെല്ലാം പരിശോധിക്കുമെന്നും, തിരഞ്ഞെടുപ്പ് കമ്മീഷണറുടെ ഭാഗത്തുനിന്ന് ഏകപക്ഷീയമായ തീരുമാനങ്ങള്‍ ഉണ്ടായിട്ടുണ്ടെന്ന് തെളിഞ്ഞാല്‍ കർശനമായി ഇടപെടുമെന്നും സുപ്രീം കോടതി മുന്നറിയിപ്പ് നല്‍കി. പ്രത്യേക തീവ്ര പരിഷ്കരണ പ്രക്രിയ മരവിപ്പിക്കണമെന്ന ആവശ്യവും കോടതി കേള്‍ക്കും. സുതാര്യതയില്ലാത്ത തീരുമാനങ്ങള്‍ കാരണം രാജ്യം പ്രതിഷേധത്തില്‍ കത്തുകയാണെന്നും, 2023-ലെ നിയമഭേദഗതിയിലൂടെ കമ്മീഷണർക്ക് ജഡ്ജിമാർക്ക് പോലുമില്ലാത്ത പരിരക്ഷയാണ് നല്‍കിയിട്ടുള്ളതെന്നും ഹർജിക്കാർ ചൂണ്ടിക്കാട്ടി
അതേസമയം, ഗ്യാനേഷ് കുമാറിനെ സസ്പെൻഡ് ചെയ്യണമെന്ന ഹർജിക്കാരുടെ ആവശ്യം തള്ളിയ കോടതി അടിയന്തര ഇടക്കാല ഉത്തരവ് പുറപ്പെടുവിക്കാൻ തയ്യാറായില്ല. ഇത്തരം നടപടികള്‍ ഉണ്ടായാല്‍ രാജ്യത്ത് തിരഞ്ഞെടുപ്പുകള്‍ ആര് നടത്തുമെന്നാണ് കോടതി ചോദിച്ചത്. നിലവിലെ പ്രധാന രേഖകളൊന്നും നശിപ്പിക്കപ്പെടരുതെന്ന് കർശന നിർദ്ദേശം നല്‍കിയ സുപ്രീം കോടതി കേസ് അടുത്ത ആഴ്ച വീണ്ടും പരിഗണിക്കാനായി മാറ്റി.
SUMMARY: Plea against Gyanesh Kumar: Supreme Court issues notice to Election Commission
