ബെംഗളൂരു: ഉത്തര കന്നഡ ജില്ലയിലെ മുരുഡേശ്വരയിലുണ്ടായ വാഹനാപകടത്തില്‍ മലയാളി യുവാവ് മരിച്ചു. സ്ത്രീകളും കുട്ടിയും ഉള്‍പ്പെടെ നാലുപേര്‍ക്ക് പരുക്കേറ്റു. കാസറഗോഡ് നീലേശ്വരം കരുവാച്ചേരി എസ് എസ് കലാമന്ദിരത്തിന് സമീപത്തെ സത്യനാഥ് ദമ്പതികളുടെ മകന്‍ സാഗര്‍നാഥ് (44) ആണ് മരിച്ചത്.
മുരുഡേശ്വര റെയിൽവേ സ്റ്റേഷന് എതിർവശത്ത് ദേശീയപാത 66 ലാണ് അപകടം നടന്നത്. മുരുഡേശ്വരത്തേക്ക് വരികയായിരുന്ന കാർ നിയന്ത്രണം നഷ്ടപ്പെട്ട് റോഡരികിലുള്ള വൈദ്യുത തൂണിൽ ഇടിച്ചാണ് അപകടം ഉണ്ടായത്. ഗുരുതര പരുക്കേറ്റ സാഗര്‍നാഥ് സംഭവ സ്ഥലത്ത് വെച്ച് തന്നെ മരണപ്പെട്ടു.
സഹപാഠിയും സുഹൃത്തുമായ നീലേശ്വരം രാജാസ് ഹയര്‍ സെക്കന്‍ഡറി സ്‌കൂളിലെ അധ്യാപകന്‍ പടിഞ്ഞാറ്റം കൊഴുവലിലെ ടി വി അവിനാഷ്, ഭാര്യ നീതു, നാല് വയസ്സുള്ള മകള്‍ ആവണി, ഭാര്യാ മാതാവ് ജാനകി എന്നിവര്‍ക്കാണ് പരുക്കേറ്റത്. ഇവരെ മംഗളൂരുവിലെ ആശുപത്രിയില്‍ പ്രവേശിപ്പിച്ചു. വിമുക്തഭടനാണ് സാഗര്‍നാഥ്. തീര്‍ഥാടന യാത്ര കഴിഞ്ഞ് നാട്ടിലേക്ക് മടങ്ങുമ്പോഴാണ് അപകടമുണ്ടായതെന്നാണ് വിവരം.
SUMMARY: Road accident; Malayali youth dies, four injured
