ബെംഗളൂരു: സംഗീത പരിപാടിക്കിടെ പഹൽഗാം പരാമർശം നടത്തിയതുമായി ബന്ധപ്പെട്ട് ഗായകൻ സോനു നിഗത്തിന്റെ ഗാനം കന്നഡ സിനിമയിൽ നിന്നും ഒഴിവാക്കി. കുലദള്ളി കീല്യാവുഡോ എന്ന ചിത്രത്തിൽ നിന്നാണ് അദ്ദേഹത്തിന്റെ ഗാനം അണിയറ പ്രവർത്തകർ നീക്കിയത്. ചിത്രത്തിലെ മനസു ഹാത്തടെ എന്ന ഗാനമാണ് സോനു നിഗം ആലപിച്ചിരുന്നത്.
സോനു നിഗം മികച്ച ഗായകനെന്നതിൽ തർക്കമില്ല. എന്നാൽ സംഗീത പരിപാടിയിൽ കന്നഡയെക്കുറിച്ച് അദ്ദേഹം പറഞ്ഞതിൽ എല്ലാവരും അസ്വസ്ഥരാണ്. ഇത്തരമൊരു അപമാനം ഒരിക്കലും കന്നഡിഗർക്ക് സഹിക്കാനാകില്ലെന്ന് സിനിമയുടെ അണിയറ പ്രവർത്തകർ പറഞ്ഞു. മനോമൂർത്തി സംഗീതം ചെയ്ത ഗാനമാണ് ചിത്രത്തിൽ നിന്ന് നീക്കിയത്. സോനു നിഗത്തിനൊപ്പം ഇന്ദു നാഗരാജാണ് ആലപിച്ചിരുന്നത്. ഈ ഗാനം സോനു നിഗം തന്റെ യുട്യൂബ് ചാനലിൽ ഉൾപ്പെടുത്തിയിരുന്നു.
ബെംഗളൂരുവിലെ സ്വകാര്യ കോളേജിൽ നടന്ന സംഗീത പരിപാടിയിൽ കന്നഡ ഗാനം തുടർച്ചയായി ആവശ്യപ്പെട്ട ആരാധകനോട് ഇങ്ങനെയുള്ള പെരുമാറ്റം കൊണ്ടാണ് പഹൽഗാം ഭീകരാക്രമണം ഉണ്ടായതെന്ന തരത്തിലായിരുന്നു സോനു നിഗത്തിന്റെ പ്രതികരണം. വിമർശനം രൂക്ഷമായതോടെ ഗായകൻ മാപ്പ് പറയുകയും വിശദീകരണം നൽകുകയും ചെയ്തിരുന്നു.
TAGS: KARNATAKA | SONU NIGAM
SUMMARY: Sonu nigam song removed from kannada movie
