തിരുവനന്തപുരം: ഗാർഹിക പീഡനങ്ങള്‍ വർദ്ധിച്ചുവരുന്ന പശ്ചാത്തലത്തില്‍, അവയ്ക്കെതിരെ ശക്തമായ പ്രതിരോധവുമായി ആഭ്യന്തര വകുപ്പ് ‘സ്പീക് അപ്’ പദ്ധതിക്ക് രൂപം നല്‍കി. ഗാർഹിക പീഡന പരാതികള്‍ നല്‍കുന്ന സ്ത്രീകളുടെ വ്യക്തിവിവരങ്ങള്‍ തികച്ചും രഹസ്യമായി സൂക്ഷിക്കുമെന്ന് പദ്ധതിയുടെ നോഡല്‍ ഓഫീറായ ഐ.ജി അജീതാ ബീഗം വ്യക്തമാക്കി.
വീടിന്റെ അകത്തളങ്ങളില്‍ ഇപ്പോഴും തുടരുന്ന സ്ത്രീധന പീഡനങ്ങള്‍ക്കും അതിക്രമങ്ങള്‍ക്കും അറുതിവരുത്തുക എന്ന ലക്ഷ്യത്തോടെയാണ് ഈ പുതിയ ആഭ്യന്തര വകുപ്പ് പദ്ധതി പ്രഖ്യാപിച്ചിരിക്കുന്നത്. സ്ത്രീധന പീഡനത്തെ തുടർന്ന് ജീവൻ നഷ്ടമായ വിസ്മയ, ഉത്തര തുടങ്ങിയവരുടെ ഓർമ്മകള്‍ ഇനിയും ഈ നാട് മായ്ച്ചുകളഞ്ഞിട്ടില്ല. അടുത്തിടെ കൊല്ലത്തുനിന്നും പുറത്തുവന്ന സ്ത്രീധന പീഡനത്തിന്റെ ഞെട്ടിക്കുന്ന ദൃശ്യങ്ങളും വലിയ ചർച്ചകള്‍ക്ക് വഴിവെച്ചിരുന്നു.
ഇത്തരം സംഭവങ്ങള്‍ ആവർത്തിക്കുമ്പോഴും, സമൂഹത്തില്‍ വേരൂന്നിയ ഈ വിപത്തിനെതിരെ പ്രഖ്യാപിക്കപ്പെടുന്ന പദ്ധതികള്‍ പലപ്പോഴും ഫലം കാണുന്നില്ലെന്ന ആക്ഷേപം ശക്തമാണ്. കഴിഞ്ഞ ഏഴ് വർഷത്തിനിടയില്‍ മാത്രം ഗാർഹിക പീഡനങ്ങളെ തുടർന്ന് 92 സ്ത്രീകളാണ് കേരളത്തില്‍ ജീവനൊടുക്കിയത്. കൂടാതെ പതിനായിരത്തോളം പരാതികളാണ് പൊലീസിന് മുന്നില്‍ എത്തിയിട്ടുള്ളത്.
SUMMARY: State government launches special scheme to prevent domestic violence; special task force formed
