കോഴിക്കോട്: കോഴിക്കോട് കോടഞ്ചേരി പഞ്ചായത്തിലെ വിനോദസഞ്ചാര കേന്ദ്രമായ പതങ്കയം വെള്ളച്ചാട്ടത്തില് കുളിക്കാനിറങ്ങിയ പതിനേഴുകാരൻ മുങ്ങിമരിച്ചു. ചെറുവണ്ണൂർ കൊളത്തറ സ്വദേശി നാസറിന്റെ മകൻ ഷബീല് ആണ് മരിച്ചത്. ഞായറാഴ്ച ഉച്ചയ്ക്ക് പന്ത്രണ്ട് മണിയോടെയായിരുന്നു ദാരുണമായ അപകടം സംഭവിച്ചത്.
രണ്ട് സുഹൃത്തുക്കള്ക്കൊപ്പമാണ് ഷബീല് പതങ്കയത്ത് എത്തിയത്. സുഹൃത്തുക്കള് വെള്ളത്തില് ഇറങ്ങിയ സമയത്ത് ഷബീല് കരയില് തന്നെ നില്ക്കുകയായിരുന്നു. എന്നാല് പിന്നീട് സുഹൃത്തുക്കള് കരയ്ക്ക് കയറി നോക്കിയപ്പോള് ഷബീലിനെ കാണാനില്ലാത്തതിനെ തുടർന്ന് ബഹളം വെക്കുകയായിരുന്നു.
ഉടൻ തന്നെ നാട്ടുകാരും മുക്കം പോലീസും സ്ഥലത്തെത്തി തിരച്ചില് ആരംഭിച്ചു. മുക്കം അഗ്നിരക്ഷാ സേനയെയും വിവരമറിയിച്ചിരുന്നു. എന്നാല് ഫയർഫോഴ്സ് സംഘം എത്തുന്നതിന് മുമ്പ് തന്നെ നാട്ടുകാരുടെ സഹായത്തോടെ നടത്തിയ തിരച്ചിലില് ഷബീലിന്റെ മൃതദേഹം കണ്ടെത്തുകയായിരുന്നു.
SUMMARY: Student drowns while bathing in waterfall
