ബെംഗളൂരു: നഗരത്തിൽ കഴിഞ്ഞ ഒരാഴ്ചയ്ക്കിടെ പച്ചക്കറികളുടെയും ഇലക്കറികളുടെയും വിലയിൽ ഗണ്യമായ വർധന. തക്കാളിയുടെ വില കിലോയ്ക്ക് 25 രൂപയിൽ നിന്ന് 54ലേക്കാണ് ഉയർന്നത്. ബീൻസിന്റെ വിലയും കിലോയ്ക്ക് 70 ൽ നിന്ന് 96ലേക്ക് വർധിച്ചു. വെള്ളരി, ക്യാപ്സിക്കം,വഴുതന, മുള്ളങ്കി, ബീറ്റ്റൂട്ട് തുടങ്ങിയ പച്ചക്കറികൾക്കും വില ഉയർന്നു.
അകാലമഴയും ഉയർന്ന താപനിലയും മൂലം വിവിധ പ്രദേശങ്ങളിലെ പച്ചക്കറി കൃഷിക്ക് നാശമുണ്ടായതാണ് വിലവർധനയ്ക്ക് പ്രധാന കാരണമെന്ന് തോട്ടക്കൃഷി വകുപ്പ് അധികൃതർ വ്യക്തമാക്കുന്നു. മഴയിൽ തക്കാളി ചെടികളിൽനിന്ന് കൊഴിഞ്ഞുവീഴുകയും ചിലയിടങ്ങളിൽ വിളകൾ ചീഞ്ഞുപോകുകയും ചെയ്തതോടെ വിപണിയിലേക്കുള്ള വരവ് കുറഞ്ഞു. ഇതോടൊപ്പം വിതരണത്തിലുണ്ടായ കുറവും വില ഉയരാൻ കാരണമായി.
ഇലക്കറികളുടെ വിലയിലും സമാനമായ വർധനയാണ് രേഖപ്പെടുത്തുന്നത്. സാധാരണയായി കുറഞ്ഞ വിലയിൽ ലഭിക്കുന്ന ഇലക്കറികൾക്ക് ഇപ്പോൾ കൂടുതൽ വില നൽകേണ്ടിവരുന്നത് ഉപഭോക്താക്കളുടെ വീട്ടുബജറ്റിനെയും ബാധിക്കുന്നുണ്ട്. മഴ തുടർന്നാൽ വരും ദിവസങ്ങളിലും വില ഉയർന്ന നിലയിൽ തുടരാൻ സാധ്യതയുണ്ടെന്നാണ് വ്യാപാര മേഖലയിൽ നിന്നുള്ള വിലയിരുത്തൽ.
അതേസമയം, ചില്ലറ വിപണിയിലെ വില കട, ഗുണനിലവാരം, വരവ് എന്നിവ അനുസരിച്ച വില വ്യത്യാസപ്പെടാം. ഇന്നലെ വിവിധ വിപണി റിപ്പോർട്ടുകളിൽ തക്കാളിയുടെ വില 52 മുതൽ 60 വരെയും രേഖപ്പെടുത്തിയിട്ടുണ്ട്.
SUMMARY: Vegetable prices soar in Bengaluru; tomatoes at Rs 54 per kg.
