ബെംഗളൂരു: സ്ത്രീകൾക്ക് സൗജന്യ ബസ് യാത്ര നൽകുന്ന സംസ്ഥാന സർക്കാരിന്റെ ശക്തി പദ്ധതി പുരുഷന്മാരിലേക്കും വ്യാപിപ്പിക്കണമെന്ന് നിയമസഭാ സ്പീക്കർ യു.ടി. ഖാദർ. വൃക്ക സംബന്ധമായ അസുഖമുള്ള പുരുഷന്മാരെയും പദ്ധതിയിൽ ഉൾപ്പെടുത്തണമെന്ന് അദ്ദേഹം ആവശ്യപ്പെട്ടു. ഇത് സംബന്ധിച്ച് മുഖ്യമന്ത്രി സിദ്ധരാമയ്യക്ക് അദ്ദേഹം കത്തയച്ചു.
മാർച്ചിൽ അവതരിപ്പിക്കാനിരിക്കുന്ന സംസ്ഥാന ബജറ്റിൽ, നിർദേശം ഉന്നയിക്കണമെന്നും അദ്ദേഹം ആവശ്യപ്പെട്ടു. ശക്തി പദ്ധതി സംസ്ഥാനത്തെ ഏറ്റവും ജനപ്രിയ സംരംഭങ്ങളിലൊന്നാണ്. തുടക്കം മുതൽ നിരവധി ഗുണഭോക്താക്കൾ പദ്ധതിയുടെ ഭാഗമായിട്ടുണ്ട്. തുടക്കത്തിൽ സ്ത്രീകൾക്ക് മാത്രമായി പരിമിതപ്പെടുത്തിയിരുന്നെങ്കിലും, ഇത് പുരുഷന്മാരിലേക്കും വ്യാപിപ്പിക്കണമെന്ന ആവശ്യം വർധിച്ചുവരികയാണ്. സംസ്ഥാനത്ത് ലക്ഷക്കണക്കിന് പുരുഷന്മാർ ദിവസവും ബസിൽ യാത്ര ചെയ്യുന്നുണ്ട്. ഇതിൽ പതിവായി ഡയാലിസിസ് ആവശ്യമുള്ള വൃക്ക സംബന്ധമായ അസുഖമുള്ളവരും ഉൾപ്പെടുന്നുണ്ട്.
ആഴ്ചയിൽ രണ്ടോ മൂന്നോ തവണ യാത്രാ ചെലവുകൾക്കായി ഗണ്യമായ തുക ചെലവഴിക്കുന്ന ഇത്തരക്കാർക്കും സൗജന്യ യാത്ര അനിവാര്യമാണ്. ഡയാലിസിസിന് വിധേയരാകുന്ന പുരുഷന്മാരെയും ഉൾപ്പെടുത്തി പദ്ധതി വിപുലീകരിക്കുന്നതിനെക്കുറിച്ച് പരിഗണിക്കണമെന്ന് ആർടിഐ പ്രവർത്തകൻ സയ്യിദ് റഹ്മാൻ സമിൻ സ്പീക്കർക്ക് കത്തെഴുതിയതിനെ തുടർന്നാണ് നടപടി.
TAGS: KARNATAKA | SHAKTHI SCHEME
SUMMARY: Speaker writes to CM on free bus travel for men undergoing treatment
